नेपालभाषा परिषद्या उपाधि व सिरपाः लःल्हायेज्या

येँ – नेपाल– भाषा परिषदं दँय्दसं बिया वयाच्वंगु थीथी सिरपाः म्हिगः छगू ज्याझ्वःया दथुइ लःल्हायेगु ज्या जुल । म्हिगः कविकेशरी चित्तधर हृदयया ११२ दँ बुदिं कुन्हु शताब्दी पुरुष डा. सत्यमोहन जोशीं मानार्थ भाषाथुवाःया उपाधि यज्ञरत्न धाख्वाःयात लःल्हानादीगु खः ।
अथे हे चित्तधर सिरपाः कवि डा. योगेन्द्र प्रधानयात व ठाकुरलाल सिरपाः कवि डा. पुष्पराज राजकर्णिकारयात लःल्हानादीगु खः ।

अथेहे ज्याझ्वलय् मोतिलक्ष्मी सिरपाः च्वमि मय्जु लोचनतारा तुलाधरयात लःल्हाःगु खःसा पूर्णहीरा सिरपाः मोतिलक्ष्मी शाक्ययात व केशवलाल बाखं सिरपाः अनिता तुलाधरयात लःल्हाःगु दु । ज्याझ्वलय् प्यंगःथां मध्ये छगः योगवीर सिंहया न्हापा पिदनेधुंकूगु सफू ‘योगसुधा’ या हानं प्रकाशन यासें विमोचन नं जूगु खः ।

ज्याझ्वः परिषद्या अध्यक्ष सुवर्ण शाक्यया सभापतित्वय् जूगु खः । ज्याझ्वलय् न्ववासें मूपाहां सत्यमोहन जोशीं नेपालभाषा साहित्यया न्हापाया च्वमितय्सं तत्कालिन शासकतलिसे संघर्ष यानाः आपालं सफूत च्वया वन, तर थौं वयाः अज्याःगु सफू ब्वनीपिं तक हे झीगु ख्यलय् मदया वंगु खँय् दुःख प्वंकादिल । ज्याझ्वलय् रुसी सांस्कृतिक केन्द्रया अध्यक्षया नं उपस्थिति दुगु खः ।