नेपालमण्डल टेलिभिजनय् हाकनं रमेश महर्जन

यल (नेपालभाषा टाइम्स) – नेपालमण्डल टेलिभिजनया अध्यक्ष पदय् हाकनं रमेश महर्जन निर्वाचित जुयादीगु दु। वंगु शनिवाः जूगु नेपालमण्डल टेलिभिजनया गुक्वःगु साधारणसभालिसें निक्वःगु दँमुँज्यां महर्जनयात हाकनं अध्यक्षय् निर्वाचित याःगु खः । नेपाल सुनचाँदी रत्न तथा आभूषण महासंघया केन्द्रीय अध्यक्षतकं जुयाच्वनादीम्ह महर्जन प्यदँया कार्यकालया निंतिं टेलिभिजनया संचालक समितिया अध्यक्षय् निर्विरोध निर्वाचित जुयादीगु खः ।

टेलिभिजनया न्हूगु संचालक समितिइ उद्योगपति पद्मज्योति, दीपक श्रेष्ठ, ध्रुवकुमार श्रेष्ठ, अधिवक्ता मंगल महर्जन, कुमारराजा महर्जन, सिल्भिया राजोपाध्याय, नातिभाइ महर्जन व शर्मिला महर्जन नं सर्वसम्मतं निर्वाचित जुयादीगु दु । निगूगु कार्यकालया निंतिं अध्यक्षय् निर्वाचित जुयादीम्ह महर्जनं वइगु दिनय् नेपालमण्डल टेलिभिजनयात देय् दुने जक मखसे देशं पिनेच्वंगु संघसंस्थालिसे नं सहकार्य यानाः गुणस्तरीय ज्याझ्वः, समाचारया उत्पादन व प्रशारण यायेगु जुइ धयादिल ।

ज्यापु समाजया भोलध्वाखास्थित भवनय् जूगु ज्याझ्वय् मूपाहांकथं समाजया अध्यक्ष चन्द्र महर्जन झायादीगु खः । ज्याझ्वलय् आर्थिक दँ ०७६/७७या वार्षिक प्रतिवेदन व लेखापरीक्षकया प्रतिवेदन नं न्ह्यब्वःगु खःसा निदँ न्ह्यः टेलिभजनपाखें ग्वसाः ग्वःगु कलाकार मनराजा सांगीतिक ज्याझ्वःपाखें जूगु आम्दानीपाखें ‘नेपालमण्डल टेलिभिजन श्रस्ता सम्मान कोष’ नं स्थापना याःगु खः । उगु कोषय् टेलिभिजनया प्रबन्ध निर्देशक प्रकाशकाजी महर्जन, उद्योगपति बाबुराजा महर्जन, समाजया नायः चन्द्र महर्जन, संचालक समितिया दुजःपिं मंगल महर्जन, शर्मिला महर्जन, सिल्भिया राजोपाध्यायं नं आर्थिक ग्वाहालि यानादीगु खः ।

ज्याझ्वलय् ज्यापु समाजया नायः महर्जन, सल्लाहकारपिं रामकाजी अवाले, बाबुराजा महर्जन लगायतं भिंतुना न्वचु बियादीगु खः । २०६८ सालया यःमरिपुन्हिकुन्हु नेवाः समुदायया भाषा, कला, संस्कृति, साहित्य, सभ्यता आदि प्रचार प्रसार यायेगु उद्देश्यं संचालनय् हःगु नेपालमण्डल टेलिभिजन नेपाःया हे न्हापांगु आदिवासी टेलिभिजन च्यानल नं खः ।

सम्बन्धित बुखँ

LEAVE YOUR COMMENTS