धनकुटा व सुनसरीइ नेवाः मिसा दबू गठन

येँ- नेवाः मिसा दबूया सुनसरी जिल्ला समिति गठन याःगु दु । सुनसरीइ जूगु छगू भेलां शीला श्रेष्ठया अध्यक्षताय् झिंप्यम्हेसिया दबूया सुनसरी जिल्ला समिति गठन याःगु खः । दबूया केन्द्रीय नायः रश्मिला प्रजापति मूपाहांकथं झायादीगु भेलाय् दबूया न्वकु विमला प्रधान, नेवाः देय् दबूया केन्द्रीय दुजःपिं लक्ष्मी शाक्य, अनिल मास्के, मिसा दबूया केन्द्रीय दुजः नापं प्रदेश १ संयोजक इन्दु श्रेष्ठ, धरान उपमहानगर कमिटीया नायः मनोहर शाक्य विशेष पाहांकथं झायादीगु खः ।

श्रेष्ठया अध्यक्षताय् गठन याःगु दबूया सुनसरी जिल्ला कमिटीइ लक्ष्मी प्रधान ‘मुना’ न्वकु, सुनिता श्रेष्ठ छ्याञ्जे, सुमित्रा शाक्य ‘सुशा कदम’ दांभरिं व कमला श्रेष्ठ लिउ छ्याञ्जेय् च्वनादीगु दु । ज्यासना पुचःया गठन लिसें कोषयाा निंतिं दांभरिं द्वःछि व न्यातका दां कोषया निंतिं लःल्हानादीगु खः ।

थुकथं हे धनकुटाय् जूगु नेवाः मिसापिनिगु भेलां नेवाः मिसा दबू धनकुटा जिल्ला समिति गठन याःगु दु । उगु भेलां सुजाता श्रेष्ठया अध्यक्षताय् झिंन्हय्म्हेसिया न्हूगु् ज्यासना पुचः गठन याःगु खः । भेलाय् दबूया केन्द्रीय नायः रश्मिला प्रजापति, प्रदेश १ या न्वकु विमला प्रधान, केन्द्रीय दुजः इन्दु श्रेष्ठ विशेष पाहांकथं झायादीगु खःसा नेवाः देय् दबू धनकुटा जिल्ला नायः श्रीकृष्ण प्रधान, धनकुटा नगरपालिकाया थीथी वडाया नेवाः जनप्रतिनिधिया नं उपस्थिति दुगु खः ।