सम्पदा संरक्षणयात कयाः नागरिक सुनुवाई

येँ – लिच्छवी व मल्लकालीन सम्पदां जायाच्वंगु स्वनिगःया सम्पदा संरक्षण नापं स्वनिगलय् विकासया नामय् अप्वया वनाच्वंगु सहरीकरण व जनसंख्यायात कयाः सरोकारवालातयसं चिउताः प्वंकूगु दु । येँ महानगरपालिकाया उपप्रमुख हरिप्रभा खड्गी श्रेष्ठं स्वनिगःया प्राचीन, ऐतिहासिक, सांस्कृतिक, धार्मिक व पुरातात्विक महत्वं जाःगु सम्पदाय् जुयाच्वंगु अतिक्रमणयात कयाः चिउताः प्वंकादीगु खः ।

सम्पदा संरक्षणया निंतिं खास हे ज्या याये मफयाच्वंगु खँय् दुःख प्वंकादिसें वय्कलं स्वनिगलय् विकासया नां बियाः जुयाच्वंगु विनासप्रति नं चिउताः प्वंकादिल । देशभक्त जनगणतान्त्रिक मोर्चा नेपाल येँ महानगर समितिं याःगु ‘राष्ट्रियता, जनतन्त्र व जनजिविका’ नां बियाः जूगु सार्वजनिक सुनुवाई ज्याझ्वलय् उपप्रमुख श्रेष्ठं उकथं चिउताः प्वंकादीगु खः ।

वय्कलं स्वनिगःया मौलिक सम्पदाया संरक्षणया निंतिं थः न्ह्याबलें न्ह्यचिला च्वनेगु प्रतिवद्धता नं प्वंकादिल । देशय् संघीयता वयेधुंकाः नं संघीय सरकारं स्थानीय तहयात जिम्मेवारी बिउगु धासें वय्कलं रानीपुखू पुनःनिर्माणया जिम्मा येँ मनपायात हे बीमाःगु खँय् बः बियादिल ।

नापं राष्ट्रिय पुनःनिर्माण प्राधिकरणयात रानीपुखू पुनःनिर्माणया जिम्मा बिउगु खँय् आपत्ति नं प्वंकादिल । ज्याझ्वलय् येँ मनपा २५ वडा अध्यक्ष नीलकाजी शाक्य लगायत सम्पदा अभियन्तापिंसं नं थःथःगु विचाः तयादीगु खः ।