‘द्वहं काण्डय् ज्वंपिं तुरुन्त त्वःति’
धरानय् द्वहं स्याःगु द्वपनय् न्याम्ह नेवाः लिसें झिम्ह ज्वन
येँ – द्वहं स्याःगु द्वपनय् धरानय् ज्वना तःपिं झिम्ह स्थानीय मनूतय्त तुरुन्त त्वःतेगु लागिं नेपाःया आदिवासीतय्गु मानव अधिकार सम्बन्धी वकिल समूह (लाहुर्निप) पाखें इनाप याःगु दु ।
लाहुर्निपया सचिव लिसें अधिवक्ता शंकर लिम्बुं थन छगू प्रेस विज्ञप्ति जारी यासें नेपाःया संविधान तथा नेपाल पक्ष जुयाच्वंगु अन्तर्राष्ट्रिय मानव अधिकारया कानूनय् थःथःगु सांस्कृतिक चलन व प्रचलन तथा परम्पराया अभ्यास याये दइगु मानव अधिकारयात प्रत्याभूत याना तःगु दु, गुलिखे आदिवासी तथा मुस्लिमतय्सं थःगु सांस्कृतिक क्रियाकलाप यायेत चौपाया (द्वहं वा द्वहंया मचा) प्रयोग यायेमाः, नेपाः धर्म निरपेक्ष राष्ट्र जूगु कारणं धर्म व संस्कृतियात हस्तक्षेप यायेगु वा अपराधीकरण यायेगु ज्या विधिसम्मत व मानव अधिकारसम्मत जुइ मखु धयातःगु दु ।
‘राज्यया थज्याःगु ज्या संविधान व मानव अधिकारया मर्म विपरित जुइगु जक मखु सामाजिक असन्तुष्टि जन्म जुयाः समुदाय बीच विभाजन पिहां वयाः सामाजिक द्वन्द्व समेत उत्पन्न जुइगु खँय् राज्य सचेत जुइमाः’ विज्ञप्तिइ धयातःगु दु ।
ज्वनातःपिंत बियातःगु अभियोगय् मेगु छुं अमूक धर्म, संस्कृति वा आस्थायात उत्तेजित यायेगु वा होचे यायेगु थेंज्याःगु नियतं ज्या याःगु धकाः द्वपं नं बिया मतःगु जूगुलिं थ्व विषयय् कानुनी कारवाही याये हे माःगु गम्भीर अवस्था खने मदुगु खँ नं विज्ञप्तिइ न्ह्यथनातःगु दु ।
धरान नगरपालिका वडा १७ य् वंगु मंसिर २८ गते द्वहं स्याःगु द्वपं बियाः स्थानीय राजेश खड्गी, राजेन्द्र खड्गी, आशिष खड्गी, अनिल शाही, अनिष शाही लगायत बहिसा मियाँ, रिजमान मियाँ, शाहदत्र मनसुरी, आशिक मनसुरी व महमुदी मनसुरी यानाः झिम्ह मनूतय् ज्वना तःगु खः ।
लाहुर्निपं थःथःगु धार्मिक आस्था कथं याःगु ज्यायात अपराधया द्वपं बियाः न्याम्ह आदिवासी जनजाति व न्याम्ह मुस्लिम समुदाययात ज्वंगु खँय् विरोध याःगु खः । ज्वना तःपिं मध्ये न्याम्ह नेवाः समुदाययापिं खः ।
तुरुन्त मत्वःतूसा आन्दोलन
सांस्कृतिक अधिकार संरक्षण मञ्चं माग याःगु दु । संरक्षण मञ्चया संयोजक लिसें नेपाल आदिवासी जनजाति महासंघ धरान नगर समन्वय परिषद्या अध्यक्ष सुवास हुक्पाचोङबाङं पिकाःगु वक्तव्यय् नेपाःया न्हूगु संविधानय् देय्यात धर्म निरपेक्ष घोषणा यायेधुंकाः द्वहं स्यात धकाः सुयातं ज्वनेगु धइगु संविधान अःखः ज्या खः धासें ज्वना तःपिंत तुरुन्त त्वःतेत माग यानातःगु दु ।
देय्या मूल कानून धइगु संविधान खः, संविधानलिसे ल्वाःगु फुक्क कानून खारेज जुइगु व्यवस्था दुसां नं संविधानलिसे मिले मजुइक मुलुकी ऐनय् तयातःगु कानूनया बः कयाः द्वहं स्याःगु द्वपनय् ज्वनेगु ज्याया भत्र्सना यासें वक्तव्यय् ज्वना तःपिं सकसितं तुरुन्त मत्वःतल धाःसा उकिया विरुद्ध सतकय् कुहां वये मालीगु ख्याच्वः नं बियातःगु दु ।
LEAVE YOUR COMMENTS