स्वम्ह शिष्यया स्वंगू कृति गुरुप्रति देछा
यल – नेपालाभाषाया आधुनिक गद्य कविताया न्ह्यलुवा नापं निबन्धकार भाजु पूर्ण वैद्यया ज्याःजंक्वया लसताय् वय्कःया हे स्वम्ह शिष्यं च्वयादीगु स्वंगू सफू थन जूगु छगू ज्याझ्वःया दथुइ मंकाःकथं पितब्वज्या जुल । कवि वैद्यया शिष्य नापं नेपालभाषाया नांजाःम्ह कवयित्री प्रतिसरा साय्मिया ‘प्रेशरकूकरया चिल्लाय्’ (चिनाखँ सफू), बाखं च्वमि मोतिलक्ष्मी शाक्यया ‘तिमिलाया जलय्’ (बाखं सफू) व बाखं च्वमि मनदेवी ताम्रकारया ‘लँय् खनागु पलाः’ (बाखं सफू) पितब्वज्या जूगु खः ।
नेपालभाषा परिषद्या नायः प्रा. सुवर्ण शाक्यया सभापतित्वय् जूगु ज्याझ्वलय् वरिष्ठ संस्कृतिविद् नापं वाङ्मय शताब्दी पुरुष सत्यमोहन जोशी मूपाहांकथं झायादीगु खः । अथे हे वरिष्ठ कवयित्री नारायणदेवी श्रेष्ठ, आख्यानकार मथुरा साय्मि, बाखं च्वमि सुवर्णकेशरी चित्रकार व समालोचक प्रा. प्रेमशान्ति तुलाधर विशेष पाहांकथं झायादीगु ज्याझ्वलय् वय्कःपिं सकसिनं मंकाःकथं स्वम्ह स्रष्टाया कृति पितब्वज्या यानादीगु खः ।
गुरुपुन्हिया न्हिकुन्हु लाकाः जूगु ज्याझ्वलय् कवयित्री प्रतिसरा साय्मिं लसकुस यानादीगु जनकवि दुर्गालाल श्रेष्ठं कवि वैद्यया ज्याःजंक्वया लसताय् च्वायदीगु चिनाखँ नं ब्वनाः न्यंकादीगु खः । खःसा कवि वैद्यया ज्याःजंक्वया लसताय् लाकाः जूगु ज्याझ्वलय् वय्कःया शिष्यपिंपाखें हनेज्या नं याःगु खः ।
ज्याझ्वःया सभापतिपाखें कवि वैद्ययात बेतालिं चिकादीगु खःसा वय्कः नापं वय्कःया जहान मीरा वैद्ययात ज्याझ्वःया मूपाहांपाखें दोसल्लां न्ययेकाः, हनापौ व लुमन्ति चिं लःल्हानादीगु खः । अथे हे वय्कःया स्वम्हं शिष्यं सिन्हः तिकाः, वसः व सिसाबुसा बियाः सगं देछानादीगु खःसा पितब्वज्या जूगु स्वंगुलिं कृति थः गुरुप्रति समर्पित यासें कवि वैद्ययात देछानादीगु खः ।
मूपाहां जोशीं देय्यात समृद्ध यायेगु धइगु सतक दयेकेगु, लः, धःया उचित व्यवस्थापन यायेगु, रेल चले यायेगु, मत च्याकेगु ज्या यायेवं जक जुइमखु धासें देशय् च्वंगु दक्वं भाषाभाषी व आदिवासी जनजातिया भाय्यात राज्यं तिबः बीगु, भाषा जातिया उत्थान यायेगु ज्यां नं देय् समृद्ध जुइ धासें थज्याःगु ज्यां देय्यात अन्तर्राष्ट्रियस्तरस्तरय् नं म्हसीकेत ग्वाहालि याइ धयादिल ।
उगु इलय् कवि वैद्यया शिष्यपिं मंगला कारंजित, सुलोचना मानन्धर, प्रेमहिरा तुलाधर, सरस्वति तुलाधर, जानकी रघुवंशी, विद्या दली, जीवन कंसाकारलिसें थःथितिपिंसं नं खादां न्ययेकाः सगं बियाः हनेज्या याःगु खः । बाखं च्वमि शाक्य, आख्यानकार साय्मिं नुगःखँ प्वंकेगुलिसें भिंतुना देछानादीगु खःसा समालोचक प्रा. तुलाधरं पितब्वज्या जूगु स्वंगुलिं सफूयात कयाः समीक्षात्मक नुगःखँ तयादीगु ज्याझ्वलय् गोविन्द ह्यूमत व रिता महर्जनं म्येँ न्यंकादीगु खः ।
मेम्ह बाखं च्वमि मनदेवी शाक्यं सुभाय् देछानादीगु ज्याझ्वलय् सपूm पिथनेत व ज्याझ्वःया निंतिं थीथीकथं ग्वाहालि यानादीपिंत लुमन्ति चिं नं लःल्हाःगु खः ।
LEAVE YOUR COMMENTS