दाहाल जिल्ल, ओली उत्साहित

सर्वोच्चया थ्व फैसला न्यनाः दाहाल–नेपाल नेकपाया अध्यक्ष पुष्पकमल दाहालं छुं ठोस प्रतिक्रिया बियादीगु मदुसा प्रधानमन्त्री केपी ओलीं धाःसा उत्साहित जुयाः प्रतिक्रिया बियादीगु दु ।

दाहालं सर्वोच्च अदालतया फैसला थःपिंसं अपेक्षा यानागु स्वयां अःखः वःगु धकाः संक्षिप्त प्रतिक्रिया बियादीगु दु । म्हिगः पत्रकारतलिसे खँ ल्हायेगु झ्वलय् वय्कलं उगु प्रतिक्रिया बियादीगु खः ।

मेखे प्रधानमन्त्री ओलीं धाःसा सर्वोच्च अदालतया फैसलायात थःपिसं सम्मान यायेगु जुइ धयादीगु दु । म्हिगः संसद भवनं पिहां वयेगु झ्वलय् पत्रकारतय्त वय्कलं उगु प्रतिक्रिया बियादीगु दु ।

सर्वोच्चपाखें संसद पुनस्र्थापना याःबलय् प्रम ओलीया प्रतिक्रिया लिबाक जक पिहां वःगु खःसां म्हिगःया फैसलाय् धाःसा वय्कलं तुरुन्त हे प्रतिक्रिया बियादीगु दु । दाहाल–नेपाल पुचलं आःयात संक्षिप्त जक प्रतिक्रिया बिउसां थुकिया पूवंक अध्ययन यानाः जक मेगु प्रतिक्रिया बीगु खँ धाःगु दु । दाहाल–नेपाल पुचः थ्व फैसलापाखें सन्तुष्ट मजूगु संकेत पिहां वःगु दु ।