सितिकं दुरु इनाः किसानतय् विरोध

चितवन – दुरुया भाः समायोजन यायेमाःगु माग यासें दुग्ध किसानतय्सं सोमवाः लँय् हे च्वनाः सितिकं दुरु इनाः विरोध प्रदर्शन
याःगु दु । दुरुइ बिया वयाच्वंगु अतिरिक्त भाः क्वकाःगु विरोधय् सतकय् दुरु प्वंकाः विरोध याना वयाच्वंपिं किसानतय्सं सोमवाः रत्ननगरय् च्वंगु पूर्वपश्चिम राजमार्गया बकुलहर चोकय् दुरु सितिकं इनाप विरोध याःगु खः ।

दुग्ध विकास संस्थान व निजी डेरितय्सं दुरुया भाः क्वकाःगु धासें वंगु शुक्रवाः निसें किसानत आन्दोलनय् कुहां वयाच्वंगु खः । उमिसं भाः समायोजन मयाःतले आन्दोलन न्ह्याकेगु खँ धाःगु दु । वंगु शुक्रवाः राप्ती नगरपालिकाया भण्डाराय् व आइतवाः खैरहनी नगरपालिकाया ज्यामिरे चोकय् थ्यंमथ्यं प्यसः लिटर दुरु सतकय् प्वंकाः किसानतय्सं विरोध प्वंकूगु खः ।

जिल्ला दुग्ध सहकारी संघया उपाध्यक्ष रामेश्वर पोखरेलं पिनें मिसावट जूगु दुरु आयात यानाः शुद्ध दुरुइ खेलवाड याःगु द्वपं बियादीगु दु ।
दुग्ध विकास संस्थान (डिडिसी)या निमित्त महाप्रबन्धक इश्वरी न्यौपानें धाःसा भाः क्वकयागु मखुसे किसानतय्त गुणस्तर कथं बिया वयाच्वंगु थप ध्यबा जक कटौती यानागु खँ कनादिल ।