नेटवर्किङया व्यापारया नामय् ठगे याइपिं ज्वन

येँ – अनलाइन नेटवर्किङ व्यापारया नामय् ठगे याःपिं निम्ह विदेशी नागरिकयात प्रहरी ज्वंगु दु । महानगरीय प्रहरी परिसरया पुचलं नेटवर्किङ व्यापारया नामय् ठगे याःपिं भारतया तरसेम शर्मा व बंगलादेशया नागरिक राहत हसन राणायात वंगु चैत ७ गते ज्वंगु खःसा म्हिगः सार्वजनिक याःगु खः । शर्मा व राणां फोरक्स अनलाइन मनी मार्केट कम्पनीइ दुगु वेस्टर्न एफएक्स कम्पनीया नेपाली एजेन्ट जूगु धासें ठगे यानाच्वंगु अनुसन्धानया झ्वलय् सीदुगु खँ परिसरया प्रवक्ता मोहन थापां कनादीगु दु ।
शर्मा व राणां प्यला न्याला न्ह्यः नेपाः दुहां वयाः कम्पनी लगानी यात धाःसा २० निसें ६० प्रतिशत तक फाइदा जुइ धासें ठगे याःगु खः । उमिगु पाखें नीम्ह स्वयां अप्वः ठगे जूगु अनुसन्धानं खुले जूगु प्रवक्ता थापां कनादीगु दु । नेपालय् दर्ता मजूगु कम्पनीइ गुलि लगानी यात उलि हे अप्वः फाइदा जुइगु धासें पीडितयात गुगुं नं कथंया प्रमाण तकं मबिउसें ठगे याःगु खँ प्रवक्ता थापां कनादीगु दु ।