जापानया लागिं गृहकार्य शुरु

येँ – जापानं थःगु देशय् मगाःगु जनशक्ति पिनेया देशं आपूर्ति यायेगु नीति कायेवं उकी थःपिं नं सहभागी जुइगु लागिं नेपाः सरकारं गृहकार्य शुरु याःगु दु । जापान सरकारं थःगु देशय् मगाःगु कृषि, स्वास्थ्य, सुसाःकुसाः आदि थेंज्याःगु ख्यलय् ज्या याइपिं ५ लाख ज्यामित विदेशं हयेगु निर्णय नकतिनि याःगु खः । ज्यामि कायेगु देय्तय् धखलय् न्हापा नां मदुगु खःसा आः उकी नेपाः लगायत मंगोलियाया नां नं थपे यानाः अनया सरकारं सिफारिस याःगु दु । जापानया संसदं मेगु वालय् उकियात अनुमोदन यायेवं धलखय् दुथ्याःगु देय्तपाखें ज्यामि कायेगु लागिं प्रक्रिया शुरु जुइ ।

थ्वहे झ्वलय् जापानलिसे थुकिया बारे डिल यायेगु लागिं नेपाः सरकारं नं आन्तरिक तयारी शुरु जूगु दु । थ्व बारे सहलह यायेत जापानया छगू पुचः हे नेपाः वयेत्यंगु खँ नं धाःगु दु । उखे वैदेशिक रोजगारीया ख्यलय् ज्या याइगु निकायतय्सं थ्व पालय् जापानलिसे खँ ल्हायेबलय् थाकुगु शर्त मतयेत नेपाः सरकारयात इनाप याःगु दु । नेपाःया श्रमिक छ्वयेगु लागिं नेपाः सरकारं जापानलिसे सरकार–सरकार सम्झौता यायेगु प्रस्ताव छ्वःगु दुसा जापानं उकियात अस्वीकार याःगु दु । उकिं नेपालं सरकारलिसे सम्झौता मयासे हे श्रमिक छ्वये फइ कथं जापानलिसे खँ ल्हायेत नं सरकारयात सुझाव बियाच्वंगु दु ।