आः लालबाबुया पलेसा यादव अमेरिका वनीगु

येँ – प्रदेश २ या मुख्यमन्त्री लालबाबु राउत अमेरिका भ्रमणय् वनेमफुगु मू कारण सरकारं पना बिउगु सिबें नं पासपोर्ट मदुगुलिं खः धाःगु दु । लिसें पार्टीया आन्तरिक ज्याझ्वः व प्रदेशया बजेटया कारणं यानाः नं वय्कः अमेरिका भ्रमण वनेगु ज्या लिछ्यायेमाःगु खँ पार्टीया सहअध्यक्ष राजेन्द्र श्रेष्ठं ‘नेपालभाषा टाइम्स’ यात कनादीगु दु ।

अमेरिकाय् जुइगु मधेशी एसोसिएसन अफ अमेरिकाया निक्वःगु महाधिवेशनय् ब्वति कायेत मुख्यमन्त्री राउत उखे वनेगु ग्वसाः दुगु खःसा वय्कःयाके पासपोर्ट मदयेवं वय्कलं याकनं पासपोर्ट दयेकेत परराष्ट्र मन्त्रालययात निवेदन बिउगु खःसां नं उगु निवेदन कथं ज्या मजूगुलिं वय्कःया भ्रमण रद्द जूगु खः ।

उगु निक्वःगु महाधिवेशन नं आःया निंतिं स्थगित जुइधुंकूगु जानकारी बियादिसें वय्कलं वइगु जुन महिनाय् महाधिवेशन जुइगु व उकी आः पार्टी अध्यक्ष उपेन्द्र यादवं ब्वति काइगु खँ धाःगु दु ।