फिब्व ख्यलय् तःगु प्रतिबन्ध खारेज

येँ (नेपालभाषा टाइम्स)- फिब्व ख्यः लगायत थीथी थासय् आन्दोलन पनेत येँया सिडीओं जारी याःगु आदेशयात सर्वोच्च अदालतं बदर याना बिउगु दु । शान्तिपूर्वक मुनाः विचार अभिव्यक्त यायेत थाय् क्वःछीगु मौलिक हक अःखः ज्या जूगु धासें सर्वोच्च अदालतं प्रशासनया आदेशयात बदर याना बिउगु खः ।

सर्वोच्च अदालतया न्यायाधीशपिं विश्वम्भरप्रसाद श्रेष्ठ व कुमार रेग्मीया मंकाः इजलासं २०७९ फागुन १५ गते याःगु पूर्णपाठय् थाय् क्वःछिनाः आन्दोलन व प्रदर्शन या धायेगु संविधानय् न्ह्यथनातःगु मौलिक हक अःखः जूगु खँ नं न्ह्यथनातःगु दु । परम्परांनिसें न्ह्याना वयाच्वंगु व सरकारं ताये दइगु थासय् आन्दोलन वा प्रदर्शन याके मबिसे निश्चित थासय् वनाः जक या धायेगु संवैधानिक हकया प्रभावकारी प्रयोग, उपभोग व अभ्यासय् पंगः थनीगु खँ नं सर्वोच्चया फैसलाय् धयातःगु दु ।

जिल्ला प्रशासन कार्यालय येँनं २०७४ फागुन ८ गते छगू सुचं पिकासें येँया फिब्व ख्यलंनिसें गुलिखे थासय् सभा, जुलुस, आन्दोलन लगायतया ज्याय् प्रतिबन्ध तःगु खः । उगु सुचनय् आन्दोलन, सभा, जुलुस यायेत तिंख्यः, सिफल व नारायण चौर लगायत निश्चित थासय् जक याये दइगु व्यवस्था याःगु खः । उगु सुचं विरुद्ध वरिष्ठ अधिवक्ता डा. दिनेश त्रिपाठीं सर्वोच्च अदालतय् जनसरोकारया विषयसं रिट तःगु खः ।