ने. सं. ११४६ चाैलागा त्रयोदशी - थिमि बालकुमारी जात्रा

मखनय् छेँ मिं नल

येँ – येँ महानगरपालिका–२४य् लाःगु मखंगल्ली च्वंगु प्रमोद तुलाधरया छेँ म्हिगः तच्वःगु मिं नःगु दु । बिहिवाः न्हिनय् १२ः३० ता इलंनिसें च्याःगु मिं स्थानीयवासी, प्रहरी, सेना व सशस्त्र प्रहरीया ग्वाहालिं न्हिनय् ३ बजे तिनि नियन्त्रणय् कायेफुगु खः ।

जनसेवा प्रहरीया कथं ३ बजे मि नियन्त्रण वःसां कुँ पिहां वयाच्वंगु खनेदुगु खः । मि स्यायेगु निंतिं प्यंगः दमकल हयेमाःगु खः । मि नियन्त्रण कायेगु झ्वलय् दोलखाया राजन थापा घाःपाः जूगु दुसा वयात वीर अस्पतालया ट्रमा सेन्टर वासः याकेत यंकूगु खँ प्रहरीं धाःगु दु । मिं नयाः लिकसं च्वंगु मेगु छेँय् नं सामान्य क्षति जूगु खँ प्रहरीं धाःगु दु ।

मिं नःगु छेँय् ग्यास पसः तयातःगु जूगुलिं ग्यास सिलिन्डर नं मूगु खँ प्रत्यक्षदर्शीतय्सं धाःगु दु । मिं छु जुयाः नःगु खः धइगु नं सीमदुगुनिगु खँ प्रहरीं धाःगु दु ।