द्यः गनं खुल गनं लुल !

येँ – नागार्जुन नगरपालिका–३ स्थित इचंगु नारायणद्यःया थासं प्यम्ह द्यः खुया यंकूगु दु । उगु लिच्छविकालीन देगलं कृष्णया निम्ह व राधाया निम्ह द्यः खुया यंकूगु खः । म्हिगः सुथय् पुजारी श्रीमद् राजोपाध्याय द्यः पुज्यायेत देगलय् वंबलय् द्यः यंकातःगु खंकूगु खः । देगलय् तयातःगु लुँवहःया तिसा खुया मयंकुसे खुँतय्सं धलौटया द्यः खुया यंकूगु खः ।

च्वय्या तल्लाय् थहां वनाः अन च्वंगु ग्रील स्यंकाःलि क्वय्या तल्लाय् कुहां वयाः द्यः खुया यंकातःगु खः । लुँ व वहःया माला धाःसा अन हे लूगु दु । थन तःक्वःमछि द्यः खुया यंकेधुंकूगु दु । स्वक्वःखुसी खुया यंकूपिं द्यःमत मलुइवं थ्व न्हूपिं द्यःत पलिस्था याःगु खः ।

स्वनिगःया प्यम्ह नारायण मध्ये कान्छाम्ह नारायण कथं पुज्याइम्ह इचंगु नारायणय् हरिशयनी एकादशी व हरिबोधनी एकादशी कुन्हु विशेष मेला जुइ । थुगुसी कोरोना महामारीं यानाः म्हो जक भक्तजनत वयेगु यानाच्वंगु दु ।

मेखे मकवानपुरया बज्रबाराहीइ धाःसा खुया यंकूपिं द्यःत लूगु दु । अन बाराहीलगायत थीथी १३ म्ह द्यःया मूर्ति खुयांकूगु खः । खुया यंकाः नं लूगु मूर्ति द्यःपाःलाः धामी सुनिलकुमार महर्जनयात जिम्मा बिउगु दु । थ्व द्यःत वय्कःया हे छेँनं वय्कःया कलाःयात मिखाय् मल्ताचुं छ्वाकाः खुँतय्सं खुया यंकूगु खः । अन बाराही, गणेश, कुमारी, इन्द्रायणी, भैरव, ख्याः, बेतालया मूर्ति खुया यंकूगु खः । वज्रबाराहीइ स्वदँय् छक्वः जात्रा जुइबलय् थ्व द्यःत देगलय् तइगु खः । थनिं ७० दँ न्ह्यः नं थ्व द्यःत खुया यंकूगु खःसा वयां लिपा न्हूपिं द्यः पलिस्था याःगु खः ।

सम्बन्धित बुखँ

LEAVE YOUR COMMENTS