जनजाति पार्टीत हानं आन्दोलनय्
७ व २२ गते जनजाति महासंघया आन्दोलनयात समर्थन
येँ – थीथी आदिवासी जनजातितय्सं गठन याना तःगु राजनीतिक पार्टीतय्गु मंकाः मोर्चा ‘संघीयताय् आधारित संघीय गठबन्धनं’ देशय् आदिवासी जनजातितय् विरुद्ध जुयाच्वंगु थीथी गतिविधिया विरोधय् आन्दोलन याइगु जूगु दु ।
न्हूगु संविधान जारी जुइधुंकाः आदिवासी जनजातितय्सं माग याना वयाच्वंगु पहिचानया मुद्दायात राज्यं वेवास्ता याःगु जक मखु, वयां लिपा नं आदिवासी जनजातितय् पहिचान व अस्तित्व नामेट याना छ्वयेगु कथं न्ह्याकाच्वंगु ज्याखँ विरुद्ध आन्दोलन यायेगु निर्णय गठबन्धनं याःगु खः ।
म्हिगः थनया रिपोर्टर्स क्लबय् छगू पत्रकार सम्मेलन यासें गठबन्धनं थःपिनि माग व आन्दोलन घोषणा याःगु खः । पत्रकार सम्मेलनय् गठबन्धनया छगू घटक जुयाच्वंगु नेपाः राष्ट्रिय पार्टीया अध्यक्ष डा. विजयप्रकाश सैंजुं थःपिनि माग व आन्दोलन सार्वजनिक यानादीगु खः ।
उगु गठबन्धनय् नेपाः पार्टी लगायत राष्ट्रिय जनमुक्ति पार्टी, आदिवासी जनजाति पार्टी नेपाल, खसान राष्ट्रिय संघर्ष समिति, तामाङसालिन लोकतान्त्रिक पार्टी, खम्बुवान राष्ट्रिय मोर्चा, सामाजिक लोकतान्त्रिक पार्टी व संघीय लोकतान्त्रिक राष्ट्रिय मोर्चा दुथ्याः ।पत्रकार सम्मेलनय् गठबन्धनया मेमेगु घटकया नेतातय्सं नं थःपिनि अवधारणा बारे खँ तयादीगु खः ।
६ बुँदे मागय् छु छु दु ?
१) थ्वहे वइगु वैशाख ७ व २२ गते यायेत्यंगु आन्दोलनय् सक्रिय रुपं ब्वति कायेगु ।
२) युरोपियन युनियनया चुनाव पर्यवेक्षण समितिं बिउगु प्रतिवेदन तुरुन्त लागू याकेत सरकारयात दबाब बीगु । संविधानय् व्यवस्था यानातःगु खस व आर्य बिस्कं बिस्कं समुदाय जूगुलिं खसयात अलग्ग तयाः जनजाति धलखय् दुथ्याकेमाः ।
३) टीकापुर घटनालिसे स्वाकाः कुनातःपिं लक्ष्मण थारू लगायत २६ म्हं थारूतय्त तुरुन्त त्वःतेमाःगु व कैलालीपाखें निर्वाचित सांसद रेशम चौधरीयात सांसद पदया प्रमाणपत्र बीत माग ।
४) विकासया नामय् स्वनिगःया आदिवासी नेवाःतय्गु भूमि कब्जा यानाः उमित विस्थापित यायेगु ज्या तुरुन्त दिकि ।
५) सुनसरीया विजयपुरस्थित किराततय्गु ऐतिहासिक दरवारयात लिच्वः लाइ कथं दयेकाच्वंगु लः ट्यांकिया निर्माण तुरुन्त दिकि । भोजपुरया भेडेटार व धोरपानीइ स्थानीय आदिवासीतय् पहिचान न्हनी कथं जुयाच्वंगु गतिविधि तुरुन्त दिकि ।
६) पहिचान मदइ कथं दयेकूगु ७ प्रदेशया खाकायात संशोधन यानाः थप प्रदेश दुथ्याकाः पहिचान सहितया संघीय व्यवस्था लागू याकेत संघर्ष यानावं वनेगु ।
LEAVE YOUR COMMENTS