दीर्घरोगीतय् उपचारय् समस्या

येँ (नेपालभाषा टाइम्स) – कोरोना महामारीया थ्व इलय् दीर्घ रोगीत तःधंगु समस्याय् लानाच्वंगु दु। दीर्घरोगीतय्त कोरोना संक्रमण जुल धाःसा ज्यान वनीगु सम्भावना अप्व ला द हे दु, तर कोरोना संक्रमण हे मजूसां थःत जुयाच्वंगु ल्वय्या उपचारय् हे समस्या फये मालाच्वंगु दु ।

कोरोना संक्रमण न्यनावनीगु खतरां यानाः सार्वजनिक यातायात चले जुयाच्वंगु मदु, लिसें हवाई उडान नं बन्द दु। थज्याःगु अवस्थाय् देशं पिहां वनाः उपचार याःवनेगु सम्भावना हे मदयाच्वंगु दु, लिसें थः न्हापां निसें उपचार याना वयाच्वनागु वा सुविधाजनक अस्पतालय् वनेत नं समस्या जुयाच्वंगु दीर्घरोगीतय् धापू दु ।

विशेष यानाः नुगःचु, जलास्येँ व क्यान्सरया ल्वगितय्त थौंकन्हय् तच्वःगु समस्याय् लाकाबिउगु दु। थज्याःगु ल्वय् जुयाच्वंपिं यक्व हे भारतय् वनाः उपचार याना वःपिं दु। फलोअपया निंतिं हाकनं भारतय् हे वनेमाःगु जुयाच्वनी, तर कोरोना महामारीया कारणं नेपाः जक मखु भारतय् नं नाका बन्द दुसा, हवाइ उडान ठप्प दु। गुकिं यानाः फलोअपया निंतिं उखे वने फयाच्वंगु मदु। अथेहे स्वनिगः दुने हे उपचार यानाच्वंपिं नं कोरोना संक्रमणया ग्याःचिकुं सुविधाजनक रुपं उपचार चूलाके खनाच्वंगु मदु। सार्वजनिक गाडी चले मजूगुलिं थःगु गाडी मदुपिं सर्वसाधारण थःगु नियमित उपचार याना वयाच्वंम्ह चिकित्सकयाथाय् हे फलोअपया निंतिं वनेत समस्या जुयाच्वंगु दु ।

थज्याःगु अवस्थाय् दीर्घरोगीतय्त फयांफछि थः सतिक लाःम्ह स्थानीय क्षेत्रया हे चिकित्सकया सल्हा कयाः उपचार व वासःया व्यवस्था यायेत चिकित्सकतय्सं सुझाव बियाच्वंगु दु। तर थथे यायेबलय् नं उपचारय् थाकुया हे च्वंगु अनुभव ल्वगितय् दु। न्हूम्ह चिकित्सकयात कनेबलय् थःगु ल्वय्या हिस्ट्रि पूवंक कनाच्वनेमालीगु जुइ, थःम्हं धयागु खँ डाक्टरं बांलाक मथुल धाःसा झन समस्या जुइगु जुयाच्वंगु दु। नियमित उपचार यानाच्वंथाय् जूसां डाक्टरं ल्वगि व भ्वं स्वयाः हे माःगु सुझाव बी, न्हूथाय् वनेबलय् झन्झन अप्वया च्वनी ।

मेखे नेपालय् उत्पादन मजूगु व नेपालय् दर्ता मदुगु वासः नयेमाःपिं ल्वगितय्त नं समस्या जुयाच्वंगु दु। छुं दीर्घरोगीतय्त चिकित्सकया सुझाव कथं हे विदेशं झिके यायेमाःगु वासः नयेमालाच्वनी । आः नाका बन्द व हवाइ उडान नं बन्द जूगुलिं विशेषतः भारत लिसें मेमेगु देशं वासः झिके यानाः नयाच्वंपिं दीर्घल्वगितय्त नं नाका बन्द ताःहाकः जुयावःलिसे समस्या जुयावःगु दु ।