देउवा विरुद्ध दनीम्ह सु ?

येँ – नेपाली कांग्रेसया तःमुँज्या जुइत आः स्वन्हु हे जक ई ल्यं दनि तर आः तक नं प्रधानमन्त्री लिसें पार्टी सभापति शेरबहादुर विरुद्ध दनीम्ह विपक्षीया उम्मेदवार सु जुइ धइगु क्वःछी फयाच्वंगु मदुनि । देउवाया विरुद्ध आः वीपी कोइराला परिवारपाखें शेखर कोइराला वा गणेशमान सिंह परिवारपाखें प्रकाशमान सिंह निम्ह मध्ये छम्ह उम्मेदवार जुइगु सम्भावना प्रवल जुया वःगु दु । तर उकिया निर्णय धाःसा अझं जुइ फयाच्वंगु मदुनि ।

म्हिगः गणेशमान सिंहया छेँ चाक्सीवारीइ न्हिछि धइथें थुकिया लागिं सहलह जूगु खः । तर लिच्वः धाःसा पिहां वःगु खँ धाःगु दु । देउवा विरुद्ध उम्मेदवारी बीगु लागिं विपक्षी पुचःपाखें प्रकाशमान सिंह, डा. शशांक कोइराला, शेखर कोइराला व रामचन्द्र पौडेल प्यम्ह तयार जुयाच्वंगु खः ।

म्हिगःया वार्ता लिपा डा. शशांक कोइरालां थः प्रतिस्पर्धां लिचिलेगु खँ धयादी धुंकूगु दु । ल्यं दुपिं स्वम्ह मध्ये नं पौडेलं यदि प्रकाशमान व शेखर कोइराला मिले जुयाः छम्ह जक दन धाःसा थः नं सुम्क च्वनेगु खँ धयादीगु दु । छुं जुयाः सिंह व कोइराला निम्हं दन धाःसा थः नं दनेगु ख्याच्वः नं वय्कलं बियादीगु दु । तर म्हिगः लिबाक तक नं कोइराला व सिंह निम्हं थःथःगु अडानं लिचिउगु मदुनि ।

सिंहं म्हिगःनिसें चाक्सीवारीइ थःगु चुनावी सम्पर्क कार्यालय समेत चायेकेधुंकूगु दु । उखे देउवां धाःसा कृष्ण सिटौलायात थःथाय् सालेगु कुतः यानादीगु दु ।

सम्बन्धित बुखँ

LEAVE YOUR COMMENTS