तःजिक क्वचाल स्वयम्भूराजया सांगीतिक सनिल

यल – वरिष्ठ म्येहालामि स्वयम्भूराज शाक्यया सांगीतिक सनिल झःझः धायेक क्वचाल ।रेकर्डिङया नितिं रेकर्डिङ स्टुडियो तकं सहज व सुलभ मजूबलय् मातं क्वथाय् प्रविधि व प्राविधिक च्वनाः अले च्वत क्वथाय् वाद्यवादक व म्येहालामि च्वनाः रेकर्ड याःगु लोकंह्वाःगु ‘ओ प्रिय लिफः स्वयाः’ म्येया नामं थुगु ‘जुजु वेयर्स ओ प्रिय लिफः स्वयाः’ ज्याझ्वः न्ह्याःगु खः ।

मतिना म्येचाःया थुगु म्ये म्येहालामि शाक्यनाप सपनाश्री नं हालादीगु खः । ज्याझ्वलय् भाजु शाक्यं स्वंगू दशकया दुने सृजना जूगु लोकंह्वाःगु १४ पु म्ये न्यंकादीगु खः । वय्कलं ‘रतन अति हे जि यःम्ह’, ‘जिके नं भतिचा माया’, ‘छं मुसुं न्हिला स्वःसा’, ‘अय् मयजु थन छकः स्व’, ‘मुसुक्क न्हिला हुँ’, ‘भिंंद्यः गुथियागु मूसःगु अय्ला’, ‘ओ प्रिय लिफः स्वयाः’, ‘घण्टाघरया क्वय्’, ‘वया ला छ थन माया मदुम्ह’, ‘जात्राया हुलय्’, ‘मिलेजूम्ह पासाया इहिपाया भ्वय् वना’ म्ये न्यंकादीगु खः ।

रेडियो नेपालय् स्वर परीक्षा उत्तीर्ण जुइधुंकाः रेकर्ड जूगु न्हापांगु म्ये “तिमीलाई मैले चिनेर पनि”, माइतीघर संकिपाया “नमान लाज” व नारायण गोपालया जीवनय् गुबलें छकःसां म्ये नं वय्कलं न्यंकादिल ।

ज्याझ्वलय् संगीता शाक्य, नीशा देसार, चन्द्रमान शाक्यं ज्वःम्येय् साथ बियादीगु खःसा स्वयम्भूराज शाक्यं लसय् हनादीगु लोकंह्वाःगु म्ये “घण्टाघरया क्वय्” सुमन कपाली व नीशा देसारं न्यंकादिल । भूपेन्द्र बज्राचार्यया संयोजनय् अनुप दास, ज्योति घिमिरे, रविन कार्कीढली, लक्ष्मी डंगोल, गौतम श्रेष्ठ, तेज श्रेष्ठ, सम्पूर्ण लामा, इन्द्रमान सिंहं वाद्यवादनय् साथ बियादिल ।

ज्याझ्वलय् दुर्गालाल श्रेष्ठ, किरण खरेल, वंशीधर बज्राचार्य, शक्तिमोहन पराजित, शाक्य सुरेन, चन्द्रमान शाक्य, तीर्थ माली, शान्त शाक्य, किर्ति श्यामसुन्दर जोशी, निर्मलरत्न शाक्य, नील शाक्य, राजेशमान सिंह, अमर चित्रकारं च्वयादीगु अले म्येहालामि स्वयम्भूराजनापं विजयसिंह मुनाल, तीर्थ माली, श्यामसुन्दर जोशी, चन्द्रमान शाक्य, विरेन शाक्य, इन्द्र ब्यञ्जनकार, सुमन कपाली, राजेशमान सिंहं लसय् हनादीगु म्ये थ्वःगु खः ।

दर्शकया नितिं प्रवेश निःशुल्क ग्वसाः ग्वःगु थुगु ज्याझ्वःया मू प्रायोजक जुजु वेयर्स, सह–प्रायोजक सम्झना लेब्ररेटोरी क्लिनिक प्रा.लि., हौगः, यल व होटल सारा श्री प्रा.लि, लुम्बिनी खःसा सर्पोटर २४ क्यरेट ज्वेलरी, मानभवन, जावलाखेल, यल, यल वेयर्सनापं आपालंसिगु तिबः व ग्वाहालि दुगु ग्वसाः खलकं जानकारी ब्यूगु दु । ज्याझ्वः संचारकर्मी सुरजवीर बज्राचार्यं न्ह्याकादीगु खः ।

मंगल इन्टरटेनमेन्ट (लिटिल स्टार रेकर्डस्) या ग्वसालय् जूगु थुगु ज्याझ्वः म्येहालामि स्वयम्भूराजया जन्म जूगु त्वाः यलया हःखाय् जूगु खःसा ज्याझ्वः मदन थापाया मयूर हुलाप्याखं न्ह्यब्वःसें न्ह्याःगु खः । ज्याझ्वलय् ज्योति घिमिरे, अनु शाक्य व प्रियंका शाक्यं नं म्ये न्यंकादीगु खः ।

ज्याझ्वः नेपाः च्यानल (डिस होम ११२ च्यानल), नेपालमण्डल टेलिभिजन, नेवाः टिभी एचडी टिभी व युट्युबपाखें प्रत्यक्ष प्रशारण जूगु खः ।
रेडियो नेपालया विशिष्ट श्रेणीया म्येहालामि स्वयम्भूराज शाक्य थीथी सिरपाः व सम्मानं छाय्पियातःम्ह म्येहालामि खः ।

तिब्बत, श्रीलंका, बंगलादेश, साउदी अरेबिया, जापान, हङकङ, बैंङ्ककय् सांगीतिक ज्याझ्वलय् ब्वति कयादीधुंकूम्ह स्वयम्भूराजया न्यागू म्येचाः पिदनेधुंकूगु दुसा ३०० पु मल्याक म्ये पिदनेधुंकूगु दु । थुगु ज्याझ्वः स्वयम्भूराज शाक्यया प्यक्वःगु याकः सांगीतिक सनिल खः ।