चीनं ‘भ्याक्सिन डिप्लोमेसी’ म्हितूगु द्वपं

येँ -चीनं नेपाःयात कोरोनाया ५ लाख डोज भ्याक्सिन बीत्यंगु खँयात भारतं चीनयागु ‘भ्याक्सिन डिप्लोमेसी’ धकाः नां बिउगु दु । भारतीय सत्तापक्षया धारणा पित बीगु धकाः नांजाःगु अंग्रेजी न्हिपौ टाइम्स अफ इण्डियाया अनलाइन संस्करणंं थ्व सम्बन्धी समाचार प्रकाशित यासें थथे टिप्पणी याःगु खः ।

नेपाःया परराष्ट्र मन्त्री प्रदिप ज्ञवालीं व चीनया विदेशमन्त्री वाङ यी दथुइ शुक्रवाः जूगु खँल्हाबल्हा लिपा म्हिगः शनिवाः चीनं नेपाःयात ५ लाख डोज भ्याक्सिन उपलब्ध याकेगु निर्णय जूगु खः । चीनं नेपाःयात न्यागू लाख डोज भ्याक्सिन उपहार बीगु धकाः जूगु थ्व निर्णययात नेपालय् स्वयां नं भारतीय मिडियां अप्वः महत्व बियाः प्रशारण याना हःगु दु ।

भारतं वंगु जनवरी महिनाय् नेपाःयात १० लाख डोज भ्याक्सिन बियाहःगु खः । थौंकन्हय् नेपालं देय्या थीथी थासय् थ्व भ्याक्सिन बीगु ज्या यानाच्वंगु दु । तर थुलिं नं मगाःगु जुयाः आः नेपालं भारतयाके २० लाख डोज भ्याक्सिन न्याना कायेगु धकाः कुतः न्ह्यःने न्ह्याकेत्यंगु दु ।
चीनं नेपाःयात बीत्यंगु भ्याक्सिन नं उपहार कथं वयेत्यंगु खः । तर चीनं नेपाःयात भ्याक्सिन उपहार बीत्यंगु खँय् धाःसा भारतया कपाः स्याःगु संकेत वःगु दु ।

थौंकन्हय् विश्वय् उत्पादन जुयाच्वंगु कुल भ्याक्सिन मध्ये भारतं ६० प्रतिशत भ्याक्सिन भारत याकःचां जक उत्पादन याइगु खँ समाचारय् धयातःगु दु । थ्व ल्याखं भारत हे आः विश्वय् कोरोनाया भ्याक्सिन वितरणया मू खेलाडी जुइफु धकाः अन्तर्राष्ट्रिय समुदायं अनुमान यानाच्वंगु इलय् चीन नं खोप वितरण यायेत हथाय्चाःगु खँ नं समाचारय् धयातःगु दु ।

भारतं वंगु जनवरी महिनाय् तिनि नेपाः बाहेक बंगलादेश, श्रीलंका व माल्दिभ्सय् कोरोनाया खोप उपहार छ्वया बिउगु खः । थ्व फुक्क देशय् ताः ई न्ह्यवंनिसें यक्व मात्राय् लगानी याना वयाच्वंगु दु । थःपिंसं लगानी याना वयाच्वनागु देशय् हे भारतं थथे खोप उपहार छ्वःगु खनाः चीन थारान्हूगु खँ समाचारय् धयातःगु दु । अय् जुयाः चीन हथाय्चाःगु टिप्पणी उकी दु ।

चीनं नेपाःयात खोप उपहार बीगु जुल धकाः बचं बिउसां थ्व खोप सम्बन्धी थीथी भ्वं धाःसा नेपाःयात उपलब्ध याये मानिगु खँ नं समाचारय् धयातःगु दु । नेपाःपाखें थ्व भ्वं स्वयाः उकियात पाय्छि जुल धकाः लिसः छ्वयेधुंकाः जक चीनं थ्व खोप छ्वये फइगु खँ नं समाचारय् धयातःगु दु । चीनं छ्वये धाःगु खोप नेपालय् प्रयोग याये योग्य जू वा मजू धयागु खँ अझ नं स्पष्ट मजूनि धइगु आशय उकी तयातःगु दु ।