ने. सं. ११४४ कौलाथ्व षष्ठी -

छु लँपुइ न्ह्यानाच्वन मुलुक ?

वर्तमान सरकारया गतिविधियात कयाः राजनीतिक ख्यलय् जक मखु आम जनताया दथुइ नं असन्तुष्टिया सः अप्वया वयाच्वंगु दु । सरकारया हरेक गतिविधि व निर्णयत विवादया घेराय् लानाच्वंगु दु । आम जनताया हक हितयात स्वयाः नं छगू वर्ग व समूहया स्वार्थपूर्तिया निंतिं जक सरकारं ज्या यानाहःगु असन्तुष्टि आम जनमानसय् ब्वलना वःगु दु ।

क्वचाःगु प्रदेश व संसदीय चुनावय् ब्यापक बहुमत हयेत ताःलाःगु बामपन्थी बिचाःया सरकारया आः बहुमतीय सरकार जक मखुसें निगू तःधंगु राजनैतिक शक्ति नेकपा एमाले व माओवादी केन्द्रया एकिकरण लिपा थुगु सरकार बहुमतीय सरकार जूगु दु । नेपालय् बहुमतीय सरकार अति दुर्लभ जुइगु याः ।

क्वचाःगु थीथी चरणया निर्वाचनय् थुकथं राजनीतिक पार्टीयात आम जनतां मतदान याःगु कारण मुलुकया विकास व स्थायी सरकारया निर्माणया निंतिं खः न कि बामपन्थी विचारधाराया मनूत सरकारय् वनाः थः यःयःथे राज्य संचालन यायेगु निंतिं खः ।

तर आः सत्ताय् थ्यनाच्वंपिं राजनीतिक पार्टीतय्सं थःपिंत आम मतदातातय्सं मतदान याःगुया कारण इमिगु बिचाःपाखें प्रभावित जुयाः मुलुकय् एकछत्रीय बाम सरकारया स्थापना धकाः एकलौटी ढंगं सरकार न्ह्याकेगु कुतः यानाच्वंगु खनेदत ।

संघीयता थःपिनिगु माग मखु धकाः खुल्लाकथं वकालत याना जुइगु नेकपा एमाले पार्टीयात क्वचाःगु निर्वाचनय् आम मतदातां बहुमतया मतदान याःगु थुगु बिचाःया समर्थनय् मखुसें मुलुकय् स्थायी सरकारया चाहना अनुरुप खः ।

थःपिं हे सर्वेसर्वा धयागु मान्यता स्थापित यानाः सर्वोच्च अदालतं दोषी करार यानाः जेल सजायँ फयाच्वंम्हेसित तकं आम माफी बियाः लोकतन्त्रया मान्यतायात हास्यास्पद याना बिउगु खँ आम जनतां वाःचायेकाच्वंगु दु । आःया बहुमतीय सरकार निर्वाचन मार्फत सत्ताय् थ्यंगु खँय् विवाद मदु ।

अझ थुगु राजनीतिक पार्टीतय्सं मुलुकय् सत्ताया आमूल परिवर्तनया नारा ज्वनाः जनताया न्ह्यःने मतदान फ्वंगु खः । स्थायी सरकार, आर्थिक क्रान्तिया माध्यमं मुलुकयात विकास यायेगु म्हगस नं इना बिउगु खः । तर आःया इलय् थुगु सरकारं गुलि नं पलाः ल्ह्वन थुपिं फुक्कं जनभावनाया अःखः जूगु नं वास्तविकता खः ।

आःया बहुमतीय सरकारं मुलुकयात विकासया लँपुइ यंकेगु स्वयां नं थःपिंत राजनीतिक ख्यलय् शीर्ष स्थानय् तयेगु व विरोधीतय्त निर्मूल हे याना छ्वयेगु नीति कयाहःगु खः ला धयागु नं न्ह्यसः ब्वलनावःगु दु । थःत लोकतान्त्रिक सरकारया दावी यानाच्वंगु केपी ओलीया सरकारं आम जनताया लोकतान्त्रिक अधिकार कुण्ठित यायेगु कुतः न्ह्याकूगु खँय् सर्वब्यापी निन्दा जूगु दु ।

न्हापा थःपिं सरकारं पिने लानाच्वंगु इलय् सरकारया विरोधय् गतिविधि न्ह्याकेगु दबू दयेकातःगु थीथी थासय् थःपिं सत्ताय् थ्यनेवं उज्वःगु थासय् विरोधया ज्याझ्वः बर्जित यानाः हास्यास्पद निर्णय सार्वजनिक याःगु जक मखु, अज्याःगु थासय् जुइगु विरोध ज्याझ्वलं थःपिनिगु सत्ताया मेच क्वःथलेफु धयागु ग्याःचिकु नं क्यनेगु ज्या याःगु खनेदत ।

वर्तमान सरकार प्रमुख केपी ओलीया न्हापाया गतिविधि व बिचाःयात हाकनं छकः लुमंका स्वयेगु खःसा थुम्ह मनू संविधानसभांनिसें संघीयता विरोधी, आदिवासी जनजातिया हक अधिकार स्थापना लिसें पहिचान तकं विरोधीम्ह खः धयागु अथें लुमंका बी ।

संघीयता थःपिनिगु माग मखु धकाः खुल्लाकथं वकालत याना जुइगु नेकपा एमाले पार्टीयात क्वचाःगु निर्वाचनय् आम मतदातां बहुमतया मतदान याःगु थुगु बिचाःया समर्थनय् मखुसें मुलुकय् स्थायी सरकारया चाहना अनुरुप खः धयागु हेक्का तकं मतसें आः आम जनताया दथुइ जीवन हे कष्टकर जुइकथं थीथी कथंया कर वृद्धिं थ्व सरकारप्रति जनताया निराशा च्वकाय् थ्यनेधुंकूगु दु ।

वर्तमान सरकारया शुरु निर्माण इलय् आम जनता सरकारप्रति गुलि विश्वस्त जूगु खः, आःया इलय् थ्व सोचय् धमाधम नकरात्मक सोच प्रवेश जुयाच्वंगु दु । मुलुकय् वंगु विनाशकारी तःभुखाचं प्रभावित जुयाः आक्रान्त जुयाच्वंपिं जनतां आः तकं राहतया सासः ल्हाये फयाच्वंगु मदु । उकिसनं छुं ई न्ह्यः वर्षाया कारणं वःगु प्राकृतिक विपद्यात नं राज्यं कुगाक्क सम्बोधन यायेफुगु मदुनि ।

सरकारं आःया इलय् बजेट मार्फत इन्टरनेट व संचार माध्यमय् थप करया भार क्वबिका बिउगुलिं आम जनताया मानसिकताय् हे तःधंगु नकारात्मक लिच्वः लाःवंगु दु । विश्वया संचार माध्यमय् इन्टरनेटया भाः धमाधम म्हो दामं उपलब्ध जुयाच्वंगु इलय् थन करया भार थप यानाः थुकियात झन थिके याना बिउगु दु ।

स्वयेबलय् थ्व सामान्य कर वृद्धि थें खनेदुसां दुसां थुकिया प्रभाव ब्यापक व दुरगामी जूवंगु दु । थौंया जीवनयापनय् अभिन्न ब्व जुइधुंकूगु इन्टरनेट व मोबाइल सेवाय् जूगु कर बृद्धिं नेपाःया शिक्षा ख्यलय् जक मखु थ्वनाप सम्बन्धित हरेक ख्यः हे प्रभावित जुइगु निश्चित दु । सरकारं दूर शिक्षाया प्रचार गांगामय् तकं यानाच्वंगु दु, तर थ्व कर वृद्धिं थुकी प्रत्यक्ष लिच्वः लाइगु निश्चित दु ।

थ्व करवृद्धि मुलुकया विकासया निंतिं मजुसे सरकारी कर्मचारी, सांसद, पूर्व पदाधिकारीतय्गु भत्ता व सुविधा बृद्धि यायेत खः धयागु खँ सरकारं थ्व सम्बन्धय् यानाच्वंगु थीथी निर्णयं प्रष्ट याइ । आःया जनतां मालाच्वंगु देय्या समृद्धी, विकास व सशक्त अर्थतन्त्र खः । मुलुकया छगू सशक्त आयस्रोत कर खः । थुकी फयाफत्तले करदातात दुथ्याकेगु नं स्वाभाविक हे खः ।

तर अर्थतन्त्र सशक्त यायेगु खँय् अप्रत्यक्ष कर बल्लाकेमाःगु थासय् प्रत्यक्षकरया दायरा व सिमा अप्वयेकेगु धयागु मुलुकया अर्थतन्त्र कमजोर जुया वनाच्वंगुया संकेत खः । सरकारया अकर्मण्यता व विवेकहीन नीतिं मुलुक धात्थें हे ताथ जुइगु लँपुइ न्ह्यानाच्वंगु जकं मखुला ? चिन्ताया विषय जुया बिउगु दु ।