कार्यवाहक मेयरया वसः फ्रान्सय् चर्चा

येँ (नेपालभाषा टाइम्स) – येँ महानगरपालिकाया कार्यवाहक मेयर सुनिता डंगोलं कान्स फिल्म फेस्टिभलय् पुनावंगु वसः थौंकन्हय् चर्चाय् वयाच्वंगु दु । नेवाः वसःयात फ्युजन यानाः सुयातःगु वसतं कान्सय् यक्व हे फोटोग्राफरतय् ध्यान सालाकाःगु खँ धाःगु दु ।

परम्परागत हाकुपतासियात हाकुगु ब्व व ह्याउँगु किनारा सहित आधुनिक रुपं न्ह्यब्वयातःगु उगु वसः श्रीजा श्रेष्ठं डिजाइन यानादीगु खः । नेवाः मिसातय् शक्ति, गौरवया प्रतीककथं जुयाच्वंगु थ्व वसःया सांस्कृतिक पहिचान ल्यंकाः परम्परागत वसःयात परिस्कृत यानाः डिजाइन यानातःगु खः । परम्परागत कापःयात न्हूगु डिजाइनय् फीगु झ्वलय् कावा मेयर डंगोलं नेवाःतय् परम्परागत तिसा न्यापु सिखः नंं तियावंगु खः । गुकिं आधुनिकता व परम्परागत सुन्दरताया समिश्रण खनेदुगु खँ धाःगु दु । कावा मेयर डंगोलं पुनावंगु वसतं स्वनिगःया नेवाः शैलीयात कान्स न्ह्यब्वयेत सफल जूगु खँ धाःगु दु ।

कान्सया मेयर डेभिड लिसनार्डं अनया ऐतिहासिक होटल डेभिलेय् लसकुस याःगु ज्याझ्वलय् डंगोलं थुगु वसः पुनावंगु खः । कावा मेयर डंगोल कान्सया मेयरया निमन्त्रणाय् फेस्टिभलय् ब्वति कायेत कान्स वंगु खः । कान्स व येँ निगुलिं युनेस्कों सिर्जनात्मक शहरया धलखय् तयातःगु शहर खः । येँ देय् वंगु २०२३ अक्टोवर ३१य् आधिकारिक रुपं युनेस्कोया क्रिएटिभ सिटीज नेटवर्कय् दुथ्याःगु खः ।

थुगुसी कान्स महोत्सवय् अविनाश विक्रम शाहया नेपाली फिल्म एलिफ्यान्ट ‘इन द फगं’ ब्वति कयाच्वंगु दु । म्हिगः थ्व फिल्मया प्रिमियर जूगु खः । प्रिमियरय् थ्यंपिं दर्शकतय्सं म्हिगः थ्व फिल्म स्वये धुंकाः च्यागू मिनेट तक लापा थानाः ‘स्टाय्न्डिङ अवेशनु’ बिउगु खः । थ्व फिल्म किन्नर समुदाययापिनि बाखनय् आधारित फिल्म खः ।