जनता छखे, सरकार मेखे

नेपाल सरकारं ‘समृद्ध नेपाल ः सुखी नेपाली’ नारा बियाः विकास निर्माणया ज्या न्ह्यःने न्ह्याका वयाच्वंगु दु । अले नारा कथं गुलि तक ज्या जुयाच्वन धइगु स्वयेगु खःसा वास्तवय् जूगु छुं हे खने मदु । सरकारया तथ्यांक स्वयेगु खःसां नं पूँजीगत खर्च अर्थात विकास बजेट १० प्रतिशत हे खर्च याये मफयाच्वंगु दुसा मेखे बैकिङ प्रणाली तरलता म्हो जुया वनाच्वंगु जक मखु ब्याज दर नं झन झन थिके जुया वनाच्वंगु दु ।

उकथं हे व्यापार घाटा नं झन जक अप्वया वनाच्वंगु दु । बैकिङ प्रणाली तरलता म्हो जुइवं बैंकतय्सं अप्वः ब्याज बियाः सर्वसाधारण निक्षेपकर्ताया ध्यबा दुकायेत स्वयाच्वंगु दु । थुकिं छखे निक्षेपकर्तायात फाइदा जुइसा मेखे उद्योग व्यवसायीयात धाःसा थुकिं तच्वःगु लिच्वः लाकी ।

बैंकिङ प्रणालीइ ध्यबा मदयेवं बैंकतय्सं निक्षेपय् अप्वः ब्याज बीगु धइगु त्यासा बीबलय् लोनय् नं उकिया ब्याज अप्वइगु स्वाभाविक जुल । थुकिं यानाः औद्योगिक क्षेत्रं उत्पादन याइगु सामानया भाः थहां वनीगु निश्चित जुल । अले उकिया लिच्वः कथं सर्वसाधारण जनता हे मारय् लाइगु जुल ।

छखे जनताया क्रयशक्ति म्हो जुया वनीगु व मेखे थहां वंगु बेसाः भाःया कारणं सुखी नेपाली गुकथं जुइ फइ धइगु न्ह्यसः ब्वलनाच्वंगु दु ।
आम निर्वाचन लिपा दुइ तिहाइ बहुमतया सरकार गठन जूगु खनाः जनतां आपालं आशा याःगु खः वर्तमान सरकारपाखें । तर सरकारया ज्या स्वयेगु खःसा जनता निराश जुइगु अवस्थां मुक्त जुइफुगु स्थिति मदु ।

अले जनतां वर्तमान सरकारपाखें छुं रचनात्मक ज्या जुइगु आशा नं यायेगु ज्या त्वःतेधुंकूगु दु । वर्तमान सरकार गठन लिपा राज्य दुने थुलि अन्यौल ब्वलनाच्वंगु दु कि उकिया लेखाजोखा यानाः साध्य मजू । छखे बलात्कार, हत्या हिंसा अप्वया वनाच्वंगु दुसा गृह प्रशासन धाःसा थज्याःगु ज्या पनेगु ला छखे हे तये, म्हो यायेत तकं सक्षम जुयाच्वंगु मदु ।

जनतां वर्तमान सरकारपाखें छुं रचनात्मक ज्या जुइगु आशा नं यायेगु ज्या त्वःतेधुंकूगु दु

सरकारया वर्तमान अवस्थायात स्वयेगु खःसा आः छुं जुइ ला धइगु आशा यायेगु थाय् धमाधम म्हो जुजुं वनाच्वंगु दु । तर नं जनतां सह यानाच्वंगु दु । अले जनतां राज्य दु वा मदु धइगु महसुस तकं यायेगु स्थिति मदयाच्वंगु थ्व इलय् सरकार धाःसा थःगु हे मतापय् न्ह्यानाच्वंगु दु ।

खतुं सरकारं यानाच्वंगु ज्यायात कयाः स्वयमय् सरकारय् दुथ्याःगु पार्टी व उकिया वरिष्ठ नेता कार्यकर्तात तकं सन्तुष्ट जुइ फयाच्वंगु मदु । सरकारया कारणं यानाः पार्टी दुने नं तःधंगु समस्या ब्वलनाच्वंगु दु । गुकिया छगू प्रस्तुति कथं वंगु छुं न्हिं न्ह्यः च्वने धाःगु पोलिटब्युरो बैठकय् उपस्थित जुयाः लिपा प्रधानमन्त्री व अध्यक्ष निम्हं क्वःछिनातःगु ई स्वयां छुं लिबाक वल धकाः बैठकय् वयाच्वंपिं मेपिं नेतातय्सं छगू कथं बैठक हे बहिष्कार यानाः क्यना बिल ।

नेतात सरकार खनाः सन्तुष्ट मखु धइगु खँ थुकिं पुष्टि याइ । थथे जूगु थ्व फुक्कं बेथितिया जिम्मेवार सरकार खः । तर सरकार थः हे धाःसा यानाच्वंगु थज्याःगु बेथितियात स्वीकार यायेत तयार मदु । अझ अःखःबतं देय्या बुद्धिजीवीतय्सं सरकारया गलत ज्यायात कुंखिन धकाः प्रधानमन्त्री थम्हं हे सरकारया आलोचना याइपिं प्रवुद्ध वर्गयात माल धाःसा क्यना बी धकाः ख्याच्वः बीगु ज्या जुयाच्वंगु दु ।

सरकारया आलोचना यात धकाः बुद्धिजीवीपिंत ब्वः बीगु धइगु सरगतय् थस्वयाः थुकलं बीगु ज्या वर्तमान सरकारं याःगु दु । सरकारं छगू आइएनजीओं ग्वसाः ग्वःगु ज्याझ्वःया निंतिं स्वन्हु तक यातायात साधन जोरबिजोर प्रणालीं चले याःगु खँयात कयाः विरोध तच्वया वनेवं सम्मेलन जुयाच्वंगु इलयय् हे जोरबिजोर प्रणाली लित कायेमाल ।

अज्याःगु ज्यां आम जनतां दुःख सी मालाच्वंगु खँयात सरकारं वेवास्ता यानाच्वन धकाः नं सरकारया कडा आलोचना जुयाच्वंगु दु । अझ अजूचायापूगु खँ ला छु धाःसां थःत कम्युनिष्ट सरकार धकाः दावी याना वयाच्वंगु थ्व सरकारं छगू धार्मिक संस्थां याःगु ज्यायात पूरा सुरक्षा बीगु जक मखु उकिया वकालत तकं यायेगु ज्या धइगु वर्तमान नेपाःया निंतिं गुलि दुर्भाग्य पूर्ण खः ।

छखे नेपाः आः संघीय प्रणालीइ वनेधुंकूगु दु । तर संघीय प्रणाली कथं देय् न्ह्याकेत आः तक नं माःगु कानुनी संरचना दयेके फयाच्वंगु मदु । मेखे संघ व प्रदेशया दथुइ तच्वया वनाच्वंगु अविश्वासया पःखाः झनझन तजाः जुया वनाच्वंगु दु । तर नं देशय् छुं हे मजू थें च्वंक सरकार धाःसा मस्तराम जुइक द्यनाच्वंगु दु ।

सरकार थुलि तक निरीह जुयाच्वंगु दु कि छखे सर्वसाधारण जनतां थः म्ह्याय्पिनिगु बलात्कार लिपा जूगु हत्याया दोषीयात कारवाही यायेमाःगु माग यासें विरोध प्रदर्शन यायेमाःगु अवस्था वयाच्वंगु दु । मेखे गृह प्रशासनं निर्दोष मनूतय्त हे दोषी ठहर यानाः न्ह्याथे यानाः नं थःगु छ्यं बचे यायेगु ज्या यानाच्वंगु दु ।

थ्व धइगु सरकारया शक्ति व समय सितिं छ्वयेगु ज्या खः । वास्तविक दोषी सु धकाः सायद सरकारं मसिउगु मखु । तर सरकारं दोषीयात कार्वाही यायेगु स्वयां नं दोषीयात उन्मुक्ति बीगु लँपुइ वनाच्वंगु महसुस आम जनतां यानाच्वंगु दु । अले थुकिया लिउने सरकारया छु स्वार्थ दु धइगु न्ह्यसः नं थन ब्वलनाच्वंगु दु ।

मखु धात्थें सरकारं दोषीयात कारबाही यायेगु खःसा निर्दोष मनूतय्त दोषी करार यायेगु ज्या दिकेमाः । आः नं निम्हेसिन ज्वनाः जबर्जस्ती दोषी करार यायेत्यन धकाः कन्चनपुरया स्थानीय जनतां विरोध यायेधुंकूगु दु । लिसें ज्वंपिनि मांअबुपिंसं नं थः मस्त कुलतय् फँसे जुयाच्वंपिं खःसां नं बलात्कार व हत्या थेंज्याःगु जघन्य अपराध याइपिं मखु धयाच्वंगु दु ।

सरकारया परीक्षण थन नं जुयाच्वंगु दु कि धात्थें वास्तविक अपराधीयात कारवाही याइ कि गलत मनूतय्त दोषी करार यानाः वास्तविक दोषीयात बचे यायेगु ज्या सरकारं याइ ।

खतुं सरकारया आलोचना जुइगु ज्या तच्वया वनाच्वंगु दुसा सरकारं अज्याःगु आलोचनायात सकारात्मक रुपं कयाः देशय् विद्यमान समस्या ज्यंकेगु लँपुइ वनेमाःगु थौंया आवश्यकता खः तर सरकार आम जनता लगायत देय्या प्रवुद्ध वर्गलिसे लंच्व थकयाः धेंधेंबल्लाः याना वनेगु धकाः जकं वयाच्वंगु दु । थ्व धइगु देय् व जनताया निंतिं मेगु छगू दुर्भाग्य जुइ ।