खुसिबाः व सरकारया पहः

दँय् दसं थें थुगुसी नं खुसिबाः वयाः आपालं धनजनया नोक्सान जुल । खतुं नेपालय् वर्षाया इलय् धनजनया क्षति जुइगु जुयाच्वंगु आः मखु तर उकियात न्यूनीकरण यायेगु ज्याय् धाःसा सरकार न्ह्याबलें असफल जुयाच्वंगु दु । विपद् लिपा उकियात व्यवस्थापन यायेगु ज्याय् अझ व स्वयां नं असफल जुयाच्वंगु महसुस झीसं याना वयाच्वनागु दु ।

खुसिबालं स्वनिगः लिसें देय्न्यंकं विपद फयेमाःगु अवस्था वल । स्वनिगलय् वःगु विपद् व्यवस्थापन सुरक्षाकर्मीया सक्रियतां जूसां नं गुलिखे मनूया ज्यान बचे जुल । तर स्वनिगः पिने तराई लागाय् धाःसा खुसिबालं तसकं बांमलाक विपत्ति हयाबिल । तर राष्ट्रवादी सरकारं जनतायात तत्काल राहत बीगु स्वयां नं भारतया कारणं नेपाः डुबानय् लाःगु धकाः हल्लाखल्ला यायेगुली हे थःगु ई सितिं छ्वयाच्वन ।

तराईया खुसिबाः आःया जक समस्य मखु । गबलेनिसें भारतं कोशी बाँध दयेकल उगु इलंनिसें ब्वलनाच्वंगु समस्या समाधान यायेगु खँय् आः जक मखु न्हापांनिसें सरकारी रवैया पाय्छि जुयाच्वंगु मदु । प्रत्येक सरकारं लिपांनिसें समस्या मवइ धकाः धायेगु यानाच्वंसां नं समस्या गन खः अन हे लानाच्वंगु दु ।

अझ मेगु खँ ला थःपिंसं व्यवस्थापन यायेमफुगु समस्यायात मेपिं क्यनाः थः बचे जुइगु गुगु ज्या सरकारी पक्षं यानाच्वन थ्व दकलय् गम्भीर विषय खः । कोशी बाँध नेपाः डुबानय् लाःगु छगू कारण जुइफु । तर उकियात न्यूनीकरण यायेगु खँय् सरकारं गुबसं ध्यान बियाच्वंगु मदु । अझ सरकारी स्तरय् हे नीस्वंगु छगू समितिं बिउगु प्रतिवेदनयात तकं सरकारं प्वला मस्वःगु धइगु सरकार तराईया खुसिबाः प्रति गुलि उदासिन धइगु खँ यच्चुक क्यनाच्वंगु दु ।

छुं नं घटना जुल धाःसा उकियात कयाः छानविन वा अध्ययन यायेगु धकाः समिति दयेकी अले उगु समितिं बिउगु प्रतिवेदन लःल्हानाः कायेधुंकाः मन्त्रालयया गुगु ध्याकुनय् वांछ्वइ व तकं सरकारं सीमखु । आः नं तराईया लिसें देय्न्यंकं चलः व खुसिबाः वल । खुसिबालं धनजनया क्षति लिपा आपालं जनतां राहत पियाच्वंगु दु ।

गुलिखे जनता खुल्ला आकाशय् द्यनेमाःगु बाध्यता जुयाच्वंगु दु । तर सरकारं अन नये, त्वनेगु, पुनेगु जक मखु आः तक त्रिपाल छपाः तकं वितरण यायेगु ज्या याये फयाच्वंगु मदु वा यानाच्वंगु मदु । थ्व धइगु संघीय सरकारया गैरजिम्मेवारीपन खः । खतुं खुसिबालं पीडितयात सरकारं मन्त्रिपरिषद्या निर्णय कथं राहत बीगु घोषण याःगु खः ।

प्वाथय् दुपिं मिस्त, मचात बजि निगःया भरय् म्वाये मालाच्वंगु दुसा मेखे थःगु बाय् मदुयाः प्लास्टिक छपाः तकं न्याये मफयाः खुल्ला आकाशय् जनता म्वाये मालाच्वंगु अवस्था दु ।

तर आः तक नं पीडित जनताया थासय् त्रिपाल तकं मथ्यंगु धइगु सरकारी अर्कमण्यता खः । खुसिबाः वयेगु ज्या दीधुंकल तर जनतां राहतया महसुस याये मफइगु अवस्था छाय् वल धइगु न्ह्यसः थन ब्वलनाच्वंगु दु । निगू तिहाइया सरकारया थ्व अर्कमण्यताया कारण छु खः मालेमाःगु अवस्था वःगु दु ।

खतुं संघीय सरकार स्थानीय व प्रदेश सरकारपाखें राहत इनेगु धकाः घोषणा यायेधुंकूगु दु । तर वा दीगु प्यन्हु न्यान्हु दयेधुंकाः नं पीडित जनतां बजि निगः व छुं भचा दालमोठ नयाः न्हि छ्याये मालाच्वंगु दु । प्वाथय् दुपिं मिस्त, मचात बजि निगःया भरय् म्वाये मालाच्वंगु दुसा मेखे थःगु बाय् मदुयाः प्लास्टिक छपाः तकं न्याये मफयाः खुल्ला आकाशय् जनता म्वाये मालाच्वंगु अवस्था दु ।

थज्याःगु अवस्थाय् देशय् सरकार दु मदु धइगु न्ह्यसः नं ब्वलनाच्वंगु दु । खतुं नेपाःया खुसिबाःया पीडा मू कारण धइगु लाथेपाथे यानाच्वंगु प्राकृतिक स्रोतया दोहन नं खः । तर अज्याःगु दोहनयात नियन्त्रण यायेगु ज्याय् धाःसा सरकार असफल जक मखु, निस्क्रिय जुयाच्वंगु दु । थुकिया मू कारण धइगु अज्याःगु प्राकृतिक स्रोतया दोहन याइपिं धइगु सरकारलिसे सम्बन्ध दुपिं मनूत खः ।

अले उमित थीगु धइगु थःपिनिगु भोट बैंक वा थःपिनि समर्थक गुमे यायेगु खः । अले गबले तक अज्याःगु प्राकृतिक स्रोतया दोहन रोके जुइ मखु उगु इलय् तक जनतां खुसिबालं जक मखु, थीथी कथंया प्राकृतिक विपत्ति फये माली । खुसिबालं पीडित जनतां आः नं थीथी पहाडी लागाय् शरण काः वनेमाःगु अवस्था वयाच्वंगु दुसा गुलिखे स्कुल कलेज नं खुसिबालं पीडित जनता च्वनेमाःगु अवस्था वयाः स्कुल कलेज तकं बन्द यायेमाःगु अवस्था दु ।

अथे जुयाः सरकारं तत्काल यायेमाःगु ज्या धइगु पीडित जनताया उचित बसोबास हे खः । खुसिबालं अप्वः पीडित जुइगु वर्ग धइगु विपन्न वर्ग हे खः । सुयाके थः च्वनेगु निंतिं गतिलाःगु छेँ छखा तकं दयेकेगु औकात मदु अज्याःपिं पीडित जनतयात तत्काल राहतया व्यवस्था यायेगु थौंया आवश्यकता खः । तर थुकी सरकार चुके जुयाच्वंगु दु ।

राहत व्यवस्थापन यायेगु निंतिं संघीय सरकार जक मखु स्थानीय सरकार व प्रदेश सरकार नं चुके जुयाच्वंगु दु । अथे ला थीथी प्रदेशं थःपिनिगु प्रदेशया पीडित जनतायात थीथी कथंया राहत घोषणा यायेधुंकूगु दु । तर घोषणा जू कथं राहत इलय् पीडित जनताया थाय् थ्यनाच्वंगु मदु ।

गबले थःपिंत दुःख जूगु खः, उगु इलय् ग्वाहालि मन्त धाःसा अज्याःगु राहतया औचित्य दइ मखु । माःगु इलय् मदइगु राहतया छुं ज्या नं वइमखु । उकिं स्थानीय जनताया सिंहदरवार धयातःगु स्थानीय निकायं थःपिंत बांलाक छ्यलेगु जक याःसां नं आपालं पीडित जनतां राहतया महसुस याये फइगु खः ।

तर स्थानीय जनप्रतिनिधि धाःपिंसं नं अज्याःगु ज्याय् थःपिंत इलय् न्ह्यचिके मफइगु धइगु थःपिनिगु अर्कमण्यता ब्वयेगु खः । स्थानीय जनप्रतिनिधि दकलय् न्हापां स्थानीय जनताया दुःख व मर्मयात थुइ धइगु जनताया विश्वास खः । तर इलय् जनप्रतिनिधि धाःपिंसं थःपिसं ल्ह्वनेमाःगु पलाः मल्ह्वन धाःसा लिपा यानागु ज्याया औचित्य दइ मखु ।

उकिं स्थानीय सरकारं इलय् राहत व्यवस्थापन यायेगु ज्याय् तत्काल अग्रसर जुइमाः । अले जक स्थानीय जनतां सिंहदरवार थःगु न्ह्यःने खनी । मखु धइगु खःसा चुनावया इलय् जक थ्वयेकूगु नाराया औचित्य मदइ । चुनाव धइगु छकः जक वइगु मखु । न्यादँ लिपा हाकनं नं चुनाव वइ धइगु हेक्का तयाः जनप्रतिनिधि न्ह्याःमवनेगु खःसा उकिया लिच्वः आः वइगु चुनावं क्यनी ।

सम्बन्धित बुखँ

LEAVE YOUR COMMENTS