ने. सं. ११४४ कौलाथ्व तृतीया -

मालपोतं स्वनिगःया जग्गाया मूल्यांकन अप्वयेकल

येँ – स्वनिगःया फुक्क धयाथें मालपोत कार्यालयं जग्गाया मूल्यांकन अप्वयेकूगु दु । स्वनिगःया थीथी थाय्या जग्गा मूल्यांकन १० निसें ४० प्रतिशत तक अप्वयेकूगु खः । जग्गाया मूल्यांकन अप्वयेवं आः जग्गा न्यायेमी यायेबलय् अप्वः कर पुलेमालीगु जूगु दु । दकलय् अप्वः मूल्यांकन चाबहिल मालपोत कार्यालयं अप्वयेकूगु दु ।

चाबहिल मालपाते कार्यालयया प्रमुख बद्री कार्कीं चाबहिली कारोवार जुइगु बुढानिलकण्ठ नगरपालिका निसें गोकर्णेश्वर, येँ महानगरपालिका दुनेया जग्गाया न्यूनतम मूल्यांकन ४० प्रतिशत तक अप्वयेकागु खँ धयादीगु दु । वय्कःया कथं न्हापा न्यूनतम मूल्यांकन १० लाख जुयाच्वंगु जग्गायात आः १४ लाख तका मूल्यांकन जुइ ।

अले थ्व हे १४ लाख तका न्यूनतम मूल्यांकनया आधारय् कर पुलेमाःगु जुइ । मोलपाते कार्यालय ख्वपं नगरपालिका दुने २० प्रतिशत व मेगु थासय् १५ प्रतिशत मूल्यांकन अप्वयेकूगु दु । अथेहे मालपोत कार्यालय साँखुं १० निसें २० प्रतिशत तक अप्वयेकूगु दु । यल मालपोत कार्यालयं १५ प्रतिशत मूल्याकन अप्वयेकूगु खँ धाःगु दु ।

यल महानगर पिने नं १५ प्रतिशत हे मूल्यांकन अप्वयेकूगु खः । येँया कलंकी मालपोतं १० निसें २० प्रतिशत तक जग्गाया मूल्यांकन अप्वयेकूगु दु । सरकारं रजिस्ट्रेसन पास यायेगु निंतिं महानगरपालिका दुने ५ प्रतिशत, उपमहानगरपालिका दुने ४.५ प्रतिशत व नगरपालिका दुने ४ प्रतिशत कर कायेगु याना च्वंगु दु ।

थ्व ल्याखं न्हापा येँ महानगरपालिका दुने जग्गा कारोवार जुइबलय् प्रति आना म्होतिं नं १० लाखं मिल धाःसा ५० हजार कर पुलेमाःगु खः । आः ४० प्रतिशत बढे जूगु ल्याखं म्होतिं नं १४ लाख तका मूल्यांकन यानाः उकिया ५ प्रतिशतया ल्याखं म्होतिं नं ७० हजार तका कर पुलेमाली जुइ । अझ न्यादँ दुने न्यायेमी जूगु जुल धाःसा ५ प्रतिशत पुँजीगत लाभकर नं काइ ।

न्यादँ दुने कारोवार जूगु जुल धाःसा म्होतिं नं १ लाख २० हजार कर पुलेमालीगु जुइ । मोलपोत कार्यालयं मूल्यांकन अप्यकेवं आः जग्गा न्याइपिंत यक्व भार लाइगु जूगु दु । जग्गा कारोवारीतय्सं अप्वः थें जग्गा गुलिं कारोवार जूगु खः उलि हे ध्यबा क्यनाः रजिस्ट्रेशन पास याइमखु ।

अप्वसिनं न्यूनतम मूल्यांकन कथं जक भाः क्यनाः कर पुलेगु याइगु खः ।उकिं आः मूल्यांकन अप्वयेवं न्यूनतम जक भाः क्यंसां नं कर अप्वः पुलेमालीगु जूगु दु ।