भारु चले यायेत नेपाःया इनाप आरबिआई लिसः मबिउ

येँ – सरकारं नेपालय् भारतीय नोट चले यायेगु निंतिं भारतीय रिजर्भ बैंक –आरबीआई) यात पत्राचार याःगु खँ सीदुगु दु । तर थुकिया लिसः धाःसा भारतं आः तक बिउगु मदुनि । आरबीआईं अनुमति बिल धाःसा सरकारं भारतीय नोट नेपालय् चले यायेगु बिचाः यानाच्वंगु खँ सीदुगु दु ।

सरकारं वंगु मंसिरया लिपांगु वालय् मन्त्रिपरिषद्पाखें सछि वंगु स्वयां च्वय्या भारतीय नोटय् प्रतिबन्ध तःगु खः । थुगु निर्णयं नेपालय् स्वयां नं भारतय् अप्वः चर्चा जुल । नेपालय् दुगु पुलांगु न्यासः वंगु व द्वःछि वंगु नोट भारतीय सरकारं हिला मबिउगुलिं नेपालं भारतीय नोट प्रतिबन्ध तल धकाः भारतीय सञ्चार माध्यमं प्रचार यायेगु ज्या याःगु खः ।

भारतं सन् २०१६ अक्टोबरय् हाकूगु धनयात नियन्त्रण यायेगु धासें तःधंगु दरया नोटय् प्रतिबन्ध तःगु खः । भारतं न्यासः व द्वछि वंगु नोटया पलेसा निसः व निद्वः वंगु प्रचलनय् हःगु खः । न्हूगु नोट मेगु देशय् चले मयाःगुलिं यानाः नेपालय् नं अज्याःगु नोट चले मयायेगु निर्णय यायेमाःगु खँ राष्ट्र बैंकं धाःगु दु ।

राष्ट्र बैंकया कथं नेपालं अज्याःगु नोट भारत यंकाच्वंगु इलय् ज्वनेगु ज्या यानाच्वंगुलिं यानाः नं भारतीय नोटय् प्रतिबन्ध तयेमाःगु खः ।
भारतं नेपालय् च्वंगु न्यासः व द्वःछि वंगु थ्यंमथ्यं ६ करोड नोट हिलेगु खँय् नं वास्ता यानाच्वंगु मदु । भारतीय प्रधानमन्त्री न्याक्वः तक नेपाः भ्रमण यायेधुंकूगु दुसा नेपाः सरकारं भारतीय प्रधानमन्त्री नरेन्द्र मोदीया भ्रणणया झ्वलय् नेपालय् च्वंगु भारतीय नोट हिलाबीत तःक्वः हे इनाप यायेधुंकूगु दु ।