अनलाइन कारोवारया लिंक गोप्य तयातयेत नेप्सेया सुझाव

येँ – नेपाल स्टक एक्स्चेञ्जं अनलाइन कारोवारया निंतिं लगानीकर्तायात दलाल पाखें छ्वयाहःगु अनलाइन लिंकयात गोप्य तयेत इनाप याःगु दु । एक्स्चेञ्जया प्रवक्ता मुराहरी पराजुलीं पूर्ण रुपं अनलाइन प्रणाली कार्यान्वयन मजूतले ला खतरा जुइमखु, तर पूवंक अनलाइनय् वनेधुंकल धाःसा लगानीकर्तातय्त समस्या वयेफुगु धासेंं अनलाइन कारोवारया लिंक गोप्य तयेत सुझाव बियादीगु खः ।

नेपाल स्टक एक्सचेञ्जं शेयर कारोवारय् म्हिगः निसेंं अनलाइन प्रणाली लागू याःगु खः । अनलाइन प्रणाली लागू याःसां आः तुरुन्त लगानीकर्ता धाःसा अनलाइन पाखें शेयर न्याये–मीया निंतिं अर्डर बीफइमखु । आःयात लगानीकर्तां धाःसा अनलाइनपाखें कारोवार गुकथं न्ह्याः वनाच्वन धयागु स्वयेफइ ।

थुकिया निंतिं लगानीकर्तां ब्रोकरयाथाय् वनाः थःगु पूवंक विवरण बियाः युजर नेम व पासवर्ड कायेमाः । थःगु पूवंक विवरण बीबलय् बैंक खाता नम्बर, डिम्याट खाता नम्बर, मोबाइल वा फोन नं. व इमेल आइडी अनिवार्य बीमाः । पूवंक विरण सहित फाराम जायेका बीधुंकलकि दलालपाखें लगानीकर्ताया इमेलय् छगू लिंक छ्वयाहइ ।

थ्व लिंक चायेकाः लगानीकर्तां थःगु युजर नेम व पासवर्ड तयाः कारोवारया पूवंक विवरण स्वयेफइ । अथेहे मार्केट डेप्थ नं स्वयेफइ । न्हापा थज्याःगु सुविधा शेयर दलालतय्त जक बियातःगु खः ।नेप्सं युएटी परीक्षण मजूतले लगानीकर्ता थःम्हं हे अर्डर बीफइमखुनि धाःगु दु । अथेहे लगानीकर्ता छक्वलं अनलाइनपाखें कारोवार यायेत अभ्यस्त मजुइगुलिं समस्या जुइफुगुलिं नं आः तुरुन्त अर्डर बीगु व्यवस्था मयानानीगु खँ धाःगु दु ।

नेपालभाषा टाइम्स

च्वमिया मेमेगु

• चित्तरन्जन नेपालीयात लुमंकल
• मतया तार भूमिगत यायेगु ज्या बेवारिस
• निम्ह साहित्यकारया थौं बिचाः मुँज्या
• एमालेया संकल्प यात्रायात पहिचानवादीया हाथ्या
• शरणार्थी काण्डय् गुम्हेसित कुना हे तइगु