‘सक्षम जूगुलिं स्वतन्त्र उम्मेदवारी’
यल (नेपालभाषा टाइम्स)÷ यल उद्योग वाणिज्य संघया अध्यक्ष पदय् स्वतन्त्र उम्मेदवार बियादीम्ह रविन्द्रराज ताम्राकार प्वाःस्याः नं थः सकसितं छप्पँ यानायंकेत सक्षम दुगुलिं हे छुं नं गुटय् लगे मजुसें स्वतन्त्र उम्मेदवारी बियागु खँ धयादीगु दु ।
बिहिवाः जूगु उम्मेदवार म्हसीका ज्याझ्वलय् न्ववासें वय्कलं आः अध्यक्ष पदय् बाहेक मेमेगु पदय् उम्मेदवारी बिउपिं सकलें सक्षमपिं जूगु व यल उद्योग वाणिज्य संघ न्ह्याकेत वय्कःपिं आवश्यक दुगुलिं थःम्हं वय्कःपिं विरुद्ध मेपिं उम्मेदवार थनेगु मयासे वय्कःपिंत हे ज्वनाः न्ह्याः वनेगु ताः तयाः गुट मदयेकुसे थःम्हं अध्यक्ष पदय् स्वतन्त्र उम्मेदवारी बियागु खँ धयादीगु खः ।
यल उद्योग वाणिज्य महासंघया पीप्यक्वःगु अधिवेशन शुक्रवाः व शनिवाः जुइत्यंगु दु । अध्यक्ष पदय् प्वाःस्याः लिसें मेपिं निम्हेसिनं उम्मेदवारी बिउगु दु ।
संघया थीथी पदय् च्वनाः स्वीदँ तक सेवा यानादीधुंकूम्ह वय्कः वरिष्ठ उपाध्यक्ष तक जुयादीधुंकूम्ह खः । वरिष्ठताया ल्याखं नं थः हे अध्यक्ष जुइमाःगु दावी यानादिसें वय्कलं अध्यक्ष पदय् उम्मदेवार जूपिंसं थःत त्वःते तयार जुयादीधुंकूगु खःसां मेमेपिनि दबाबया कारणं त्वःते मफुगुलिं चुनावय् वनेमाःगु खँ नं धयादीगु दु ।
थ्व झ्वलय् वय्कलं वरिष्ठताया ल्याखं थः न्हापा हे अध्यक्ष जुइमाःगु खःसां उबलय् अध्यक्ष जुयाच्वंम्हेसिनं थः हाकनं छगू कार्यकाल दोहरे जुइगु इच्छा याःगुलिं त्वःता बियागु व मेगु पालय् थः ताम्राकार समाजया अध्यक्ष जुयाच्वनागुलिं निगू सक्रिय संस्थाय् अध्यक्ष जुइबलय् निगुलिं संस्था ज्या जुइमखु धयागु तायेकाः उबलय् थः अध्यक्ष जूमवनागु खँ नं धयादिल ।
सामाजिक ज्याय् नं सक्रिय भाजु ताम्राकार अध्यक्ष जुयाच्वनादीगु इलय् हे यलया तमकः द्यःया छेँ, लिसें व्यापारिक भवन दयेकेज्या जूगु खः । वय्कः यलय् न्हय्न्हु तक न्ह्याः उद्योग वाणिज्य महोत्सवय् नं सदस्य सचिव जुयाः महोत्सव तःजिक क्वचायेकेगुलिं महत्वपूर्ण भूमिका म्हितादीम्ह खः ।
ज्याझ्वलय् न्ववासें संचारकर्मी संजीप शिल्पकारं अध्यक्षया उम्मेदवार भाजु ताम्राकार सक्षम जूगुलिं हे थः नं वय्कःया चुनाव प्रचार समितिइ च्वनाः ज्या यानाच्वनागु धासें सक्षम उम्मेदवारयात त्याकेत इनाप यानादिल ।
LEAVE YOUR COMMENTS