लुँ व डलरया भावय् न्हूगु रेकर्ड

येँ (नेपालभाषा टाइम्स)/ नेपालय् लुँ व डलरया भावय् न्हूगु रेकर्ड कायम जूगु दु । म्हिगः नेपालय् लुँ तोलां २ लाख ५ हजार ३ तका कायम जुयाः न्हूगु रेकर्ड कायम जूगु खःसा डलरया भाः नं प्रति डलर १४१.५५ पैसा तका कायम जुयाः न्हूगु रेकर्ड कायम जूगु खः ।
म्हिगः अन्तर्राष्ट्रिय् बजारय् लुँ प्रतिऔंश ३ हजार ४७४ डलर कायम जूगु खः । डलरया भाः थहां वनेवं लुँया भाः नं थहां वंगु खँ नेपाल सुनचाँदी व्यवसायी महासंघया पुलांम्ह अध्यक्ष लिसे बजाः विश्लेषक तेजरत्न शाक्यं ‘नेपालभाषा टाइम्स’यात कनादीगु दु ।
वंगु वैशाख ९ गते अन्तर्राष्ट्रिय बजारय् लुँ प्रतिऔंश ३ हजार ४८५ डलर थ्यंगु खःसा उगु इलय् नेपालय् लुँ तोलां १ लाख ९७ हजार ९ सय तका जक कायम जूगु खः । तर आः डलरया भाः थहां वनेवं लुँया भाः नं थहां वंगु खँ बजाः विश्लेषक शाक्यं कनादीगु दु ।
उकथं हे अमेरिकी फेडरेल बैंकं ब्याज दर क्वकायेगु घोषणा यायेवं उकिया लिच्वः लुँया बजारय् लाःगु खँ नं वय्‌कलं कनादीगु दु । अमेरिका, चीन, भारत व युरोपियन युनियनं थःगु मुद्रा बल्लाकेगु निंतिं लुँइ लगानी याःगुलिं नं अन्तर्राष्ट्रिय बजारय् लुँया भाः थहां वंगु खँ वय्‌कलं कनादीगु दु । सन् २०२४ य् जक अमेरिकां १ हजार टन लुँ न्यानाः रिजर्भय् तःगु दु । न्हापा अमेरिकायाके ८ हजार टन लुँ रिजर्भय् लानाच्वंगु खः ।