खुगू संस्थान निजीख्यःयात बीगु तयारी

येँ – सरकारं खुगू सार्वजनिक संस्थानयात निजीख्यःयात चले याके बीगु जूगु दु । हेटौंडा कपडा उद्योग, बुटवल धागो कारखाना, गोरखकाली रबर उद्योग, ओरियन्टल म्याग्नेसाइट, वीरगंज चिनि कारखाना व जनकपुर चुरोट कारखाना निजीख्यःयात बीत्यंगु खः ।थुकी मध्ये हेटौंडा कपडा उद्योग, बुटवाल धागो कारखाना, गोरखकाली रबर उद्योग व जनकपुर चुरोट कारखाना चायेकेत निजी ख्यः उत्साहित जुयाच्वंगु खँ धाःगु दु ।

उद्योग वाणिज्य तथा आपूर्ति मन्त्री मातृका यादवं थ्व प्यंगू उद्योग तुरुन्त हे चले यायेत निजी ख्यः तयार दुगु खँ धयादीगु दु । वय्कलं खुगुलिं उद्योग निजी ख्यःयात चले याके बीगु निंतिं प्रक्रिया न्ह्याः वनेधुंकूगु खँ नं धयादीगु दु ।मन्त्री यादवया कथं गोरखकाली टायर व जनकपुर चुरोट कारखाना चल यायेगु निंतिं दलकय् अप्वः उद्योगीत न्ह्यःने वयाच्वंगु दु ।

सरकारं खुगू उद्योग निजी ख्यःयात बीगु निंतिं थन उद्योगय् दुपिं कर्मचारीतय् दायित्व फरफारक यायेगु ज्या यानाच्वंगु दु ।

उद्योग मन्त्रालयपाखें खुगुलिं उद्योगयात निजी ख्यःयात बीगु प्रस्ताव यंकूगु खःसां हेटौंडा व बुटवल धागो धाःसा मन्त्रिपरिषदं लिहां वःगु दु । अर्थमन्त्री युवराज खतिवडा व अर्थ मन्त्रालयया निजीकरण इकाइया सल्हा कथं हाकनं प्रस्ताव दयेकाः मन्त्रिपरिषदय् यंकेगु खँ नं मन्त्री यादवं धयादीगु दु ।

वय्कःया कथं हेटौंडा कपडा उद्योग व बुटवल धागो कारखाना बालं बियाः चले याकेत्यंगु खः । निजी ख्यःयात फुक्कं उद्योग हे जिम्म मबिसे बालं बीत्यंगु खः । २०४६ साल लिपा निजीकरण याःगु यक्व हे उद्योग बन्द यानाः सम्पत्ति मीगु ज्या जूगुलिं सउरकारं थ्व पालय् बालं जक बीगु कथं प्रस्ताव यंकूगु खः ।

मन्त्रालयया कथं बुटवल धागो उद्योग चले यायेगु निंतिं निजी ख्यःया पवन गोल्यान समूह इच्छुक जुयाच्वंगु दु । गोल्यान समूह न्हापानिसें हे सुका उद्योगय् लगानी यानाच्वंपिं खः ।

सरकारं थुपिं उद्योग निजी ख्यःयात बीगु निंतिं थन उद्योगय् दुपिं कर्मचारीतय् दायित्व फरफारक यायेगु ज्या यानाच्वंगु दु । थ्वहे झ्वलय् वीरगंज चिनी कारखानाय् ७३२ म्ह कर्मचारी सकसितं अवकास सुविधा बीधुंकूगु दु । जनकपुर चुरोट कारखानाय् नं फुक्क सम्पत्ति दायित्व फरफारक यायेगु ज्या जुयाच्वंगु दु ।

सम्बन्धित बुखँ

LEAVE YOUR COMMENTS