प्रमाणपत्र बरः तयाः त्यासा बीगु सुरु
येँ – शैक्षिक योग्यताया प्रमाणपत्र बरः तयाः त्यासा कायेगु प्रक्रिया शुरु जूगु दु । मन्त्रिपरिषदं सहुलियतपूर्ण त्यासाया निंतिं ब्याज अनुदान सम्बन्धी एकीकृत कार्यविधि २०७५ यात पारित यायेवं नेपाल राष्ट्र बैंकं परिपत्र जारी याःगु खँ धाःगु दु । शैक्षिक प्रमाणपत्र बरः तयाः त्यासा कार्यविधि मन्त्रिपरिषदं वंगु भदौ २१ गते पारित याःगु खः ।
शैक्षिक प्रमाणपत्र बरः तयाः त्यासा कायेगु निंतिं म्होतिं स्नातक तह उर्तिण जुइमाः व पीदं क्वय्यापिं जुइमाः ।
कार्यविधि पारित जुइधुंकाः आः स्नातक तह उर्तिण जूपिंसं त्यासा कायेफइ । प्रमाणपत्र बरः तयाः ७ लाख तका तक त्यासा काये फइगु खँ धाःगु दु । उकिया ब्याज दर ५ प्रतिशत जुइगु खँ कार्यविधिइ न्ह्यथनातःगु दु । शैक्षिक त्यासा वाणिज्य बैंक, विकास बैंक व वित्त कम्पनीपाखें कायेफइगु खँ राष्ट्र बैंकं धाःगु दु ।
शैक्षिक प्रमाणपत्र बरः तयाः त्यासा कायेगु निंतिं म्होतिं स्नातक तह उर्तिण जुइमाः व पीदं क्वय्यापिं जुइमाः । त्यासा कायेगु निंतिं शैक्षिक प्रमाणपत्रया सक्कली प्रति व घरेलु तथा साना उद्योग विभाग, सिप विकास तालिम केन्द्र, प्राविधिक शिक्षा तथा व्यवसायिक तालिम परिषद लगायत सरकारी निकायपाखें म्होतिं नं न्हय्न्हुया तालिम कायेमाःगु अनिवार्य व्यवस्था यानातःगु दु ।
अथेहे त्यासा स्वीकृत जुइधुंकाः अज्याःगु तालिम कयागु प्रमाणपत्र पेश याःसां जिउ । आवेदन बियागु नीछन्हुया दुने त्यासा बीगु वा मबीगु निर्णय यायेमाःगु व्यवस्था दु ।
LEAVE YOUR COMMENTS