मिसा हिंसा न्यूनीकरण अभिमुखीकरण ज्याझ्वः

यल – मिसातय्त कयाः जुइगु घरेलु हिंसाया ९० प्रतिशत स्वयां अप्वः घटना सार्वजनिक जुया वयाच्वंगु थन जूगु छगू ज्याझ्वलय् जानकारी बिउगु दु । ताम्रकार कुलदेवता उग्रचण्डी माई संरक्षण समिति (ताम्रकार समाज)या ग्वसालय् जूगु मिसा हिंसा न्यूनीकरण अभिमुखीकरण ज्याझ्वलय् नवानादीपिं वक्तातय्सं उगु खँ धयादीगु खः ।

समाजया ग्वसालय् महानगरीय प्रहरी प्रभाग मंगलबजाःया ग्वाहालिइ समुदाय प्रहरी साझेदारी अन्तर्गत जूगु मिसा हिंसा न्यूनीकरण अभिमुखीकरण ज्याझ्वलय् पितृ सत्तात्मक व्यवस्थाया कारणं सलंसः दँ न्ह्यवंनिसें मिसात विभेदया शिकार जुयाच्वनेमाःगु खँ धाःगु दु ।

अभिमुखीकरण ज्याझ्वलय् नवासें प्रभागया प्रमुखलिसें प्रहरी निरीक्षक चञ्चला श्रेष्ठं सहरय् नं मिसातय्त कयाः फरककथंया हिंसा जुइगु यानाच्वंगु धासें गां गामय् अज्याःगु घटना झन् ग्यानापुसे च्वंगु धयादिल । वय्कलं धयादिल, ‘मिसातय्गु सहन शक्ति हे इमिगु कमजोरी खः, उकिं थज्याःगु ज्याझ्वलं थनया जनताया भावना, समस्या थुइकेत तःधंगु ग्वाहालि जुइ ।’

ज्याझ्वलय् नकतिनि जक प्रमुख जिल्ला अधिकारी नियुक्त जुयाः झायादीम्ह भगिरथ पाण्डें यल देय् छगू सांस्कृति, पुरातात्विक नगरी जूगु व स्थानीय जनतया भावना व मनोविज्ञानयात थुइकाः प्रशासनं ज्या याना वनेगु जुइ धासें वय्कलं धयादिल, ‘मिसा हिंसा न्यूनीकरणया निंतिं स्थानीय व प्रहरी प्रशासनया कुतलं जक सम्भव मजुइगुलिं स्थानीय समुदायया नं ग्वाहालिया नितान्त आवश्यक दु ।’

समाजया अध्यक्ष रविन्द्रराज ताम्रकारं आःया प्रशासन उत्तरादायी समुदायमैत्री जुइ फयेकेमाः धासें प्रशासन, प्रहरी परिसर व प्रहरी प्रभागय् न्हूगु नेतृत्व वइबलय् लसकुस यायेगु व परिचयात्मक ज्याझ्वः यायेगु न्हूगु खँ मखयेधुंकल धयादिल । वय्कलं समाजं फरक अभ्यासया रुपय् लसकुस यायेगुया नापनापं शान्ति, सुरक्षाया विषयय् अन्तक्र्रिया, सहलह ज्याझ्वः याना वयाच्वंगु जानकारी बियादिल ।

लिसें वय्कलं धयादिल, ‘प्रशासनलिसे मिसातय् पुहँच म्हो जुइगु व समुदाय प्रहरी साझेदारी ज्याझ्वःया मर्म मिसातय दथुइ नं स्थापित यायेगु ल्याखं थुकथंया अभिमुखीकरण सहयोगी सिद्ध जुइ ।’

अथे हे महानगरीय प्रहरी परिसरय् न्हू नियुक्त जुया वःम्ह प्रहरी प्रमुख वरिष्ठ प्रहरी उपरीक्षक टेकप्रसाद राईं समुदाय प्रहरी साझेदारीया मर्मयात हरेक नागरिकया मन मस्तिष्कय् स्थापित यायेत छुं नं कसर ल्यंकेगु जुइमखु धासें नेवाः समुदायया भाषा, कला, संस्कृतिप्रति थःगु तःधंगु सम्मान दु धयादिल ।

नवनियुक्त प्रमुख जिल्ला अधिकारी पाण्डे, प्रहरी प्रमुख राई, प्रहरी निरीक्षक श्रेष्ठयात लसकुस यासें सम्मान नं याःगु उगु ज्याझ्वलय् समाजया उपाध्यक्ष विनोद ताम्रकार, महासचिव शम्भू गोविन्द ताम्राकारं नं नुगःखँ प्वंकादीगु खः ।

सम्बन्धित बुखँ

LEAVE YOUR COMMENTS