येँ रेड जोन, यल व ख्वप एलो जोनय्

स्वनिगलय् लकडाउन छ्वासुके मजिउगु सुरक्षा निकायया धापु

येँ – सुरक्षा निकायतय्सं लकडाउनया सम्बन्धय न्ह्यब्वःगु रणनीतिया सुझावय् येँयात रेड (ह्याउँगु) जोनय् लाकूगु दुसा यल व ख्वपयात एलो (म्हासुगु) जोनय् तःगु दु । सुरक्षा निकायं कोभिड १९ रोकथाम तथा नियन्त्रण उच्चस्तरीय समिति व गृह मन्त्रालययात लःल्हाःगु सुझावय् कोरोना संक्रमितत लूगु जिल्ला लिसें वया उच्च जोखिमय् लानाच्वंगु जिल्ला लिक्क लाःगु जिल्ला यानाः २९ गू जिल्लायात ह्याउँगु जोनय् तःगु खः । अथेहे २८ जिल्लायात एलो (म्हासुगु) व २० जिल्लायात वाउँगु जोनय् तःगु दु ।

सुझाव न्ह्यथनातःगु २९ गू जिल्ला मध्ये बागलुङ, बाँके, भोजपुर, चितवन, धनुषा, झापा, कैलाली, काठमाडौं, कञ्चनपुर, पर्सा, रौतहट, रुपन्देही, उदयपुर व बारा जिल्लाय् संक्रमितत लूगु खः । सुरक्षा निकायं थुपिं झिंन्यागुलिं जिल्लाय् थप झिंन्यान्हु लकडाउन यायेमाःगु सुझाव बियातःगु दु । अथेहे म्हासुगु जोनय् लाःगु जिल्लाय् आंशिक लकडाउन यायेगु व वाउँगु जोनय् लाःगु जिल्लाय् सामाजिक दूरी कायम यानाः गतिविधि जारी याकेमाःगु सुझाव बियातःगु दु ।

म्हासुगु जोनय् लाःगु जिल्लाय् आंशिक लकडाउन यायेगु सुझाव बियातःसां यल व ख्वप जिल्ला म्हासुगु जोनय् लाःसां थन थ्व मोडालिटी लागू मजुइगु सम्भावना दु । सुरक्षा निकायत स्वनिगलय् तुरुन्त लकडाउन तुरुन्त छ्वासुके मजिउगु धापुतिइ दु । विशेषत स्वनिगलय् लकडाउन छ्वासुकल धाःसा सामाजिक दूरी कायम याकेगुलिं सुरक्षा निकायं ज्या यायेमफइगु खँ धाःगु दु । महानगरिय प्रहरी कार्यालयं स्वनिगलय् आंशिक लकडाउन चायेकल धाःसा नियन्त्रण यायेफइ कि फइमखु धयागु बारे नं सुझाव बीधुंकूगु दु ।

स्वनिगलय् दुगु जनघनत्वया ल्याखं सुरक्षाकर्मीतय् तच्वःगु अभाव दुगुलिं थन तुरुन्त लकडाउनयात छ्वासुके मजिउगु सुरक्षा निकायतय् धापू दु । थौंकन्हय् स्वनिगलय् मुक्कं ११ हजार प्रहरीया दरबन्दी दुसां मुक्कं ९ हजार जक प्रहरी ज्याय् दु । उकी नं ३ हजार प्रहरी ला भिआइपीतय् सुरक्षा, विमानस्थलया सुरक्षाय् च्वनाच्वंगुलिं मुक्कं ६ हजार प्रहरी जक परिचालन जुयाच्वंगु दु । थज्याःगु अवस्थाय् स्वनिगलय् लकडाउन छ्वासुकल धाःसा प्रहरीं थनया मानवीय गतिविधि नियन्त्रण यायेमफइगु सुझाव वनाच्वंगु दु ।

सुरक्षा निकायपाखें लकडाउनयात कयाः सुझाव बिउसां उच्चस्तरीय समितिं धाःसा लकडाउनया मोडालिटी बारे आःतक छुं निर्णय याःगु मदुनि । तर मेमेगु सरकारी निकायतय्सं बिउगु सुझावय् धाःसा लकडाउनयात छ्वासुके माःगु सुझाव बियातःगु दु । थीथी निकायं बिउगु सुझाव लकडाउन ताःहाक जुयाच्वन धाःसा सर्वसाधारणया जीवन कष्टकर जुइगु, खाद्य संकट जुइगु लिसे अर्थतन्त्र नं भज्यंक स्यनेफुगु खँ धयातःगु दु । सर्वसाधारणया जीवन कष्टकर जुयावन धाःसा लकडाउनया अवज्ञा अप्वया वयेफुगु खँ धयातःगु दु । सुरक्षा निकायतय्सं आः हे लकडाउनया उल्लंघन अप्वयाच्वंगु रिपोर्ट गृहमन्त्रालयं बियाच्वंगु दु । (update)

भूलवश थ्वयां न्ह्यः यल व ख्वप एलो जोन जुइमाःथाय् ग्रीन जोन जुयाच्वंगुलिं भिंकाच्वना । 

इन्फोग्राफ साभार – इकान्तिपुर

सम्बन्धित बुखँ

LEAVE YOUR COMMENTS