रेशम चौधरीयात सर्वस्वसहित जन्मकैद

येँ – कैलाली जिल्ला अदालतं राजपाया सांसद रेशम चौधरी लिसें झिंछम्हेसित सर्वस्व सहित जन्मकैदया फैसला न्यंकूगु दु । स्वदँत्या न्ह्यः कैलालीया टिकापुरय् जूगु थरुहट आन्दोलनया झ्वलय् च्याम्ह प्रहरी सीगु घटनाय् सांसद चौधरी लिसें झिंछम्हेसित अदालतं दोषी ठहर यासें थ्व फैसला न्यंकूगु खः ।

वि.सं. २०७२ भदौय् जूगु प्रदर्शनया झ्वलय् हिंसात्मक घटना जूबलय् प्रहरी व छम्ह मचा सीगु खः । सर्वोच्चं न्यंकूगु फैसलाय् सजाय फःपिं मध्ये छम्ह नाबालक ज ूगुलिं वयागु कैद सजाय धाःसा बछि यानाः झिदँ जक जुइगु खँ धाःगु दु ।

थ्व घटनाय् संलग्न मेपिं झिंनिम्हेसित धाःसा स्वदँ स्वदँया कैद सजाय न्यंकूगु खःसा स्वम्हेसित सफाइ बिउगु दु । स्वदँया सजायँ न्यंकुपिं मध्ये झिंछम्हेसिनं हिरासतय् स्वदँ च्वनेधुंकूगुलिं उमित धाःसा आः हे त्वःतीगु जूगु दु । थ्व घटनाय् मेपिं स्वीछम्ह धाःसा फरार जुयाच्वंगु दु ।

टिकापुरय् जूगु थ्व घटनाय् चौधरीयात मू योजनाकार कथं ज्वनाः कुनातःगु खः । जेलय् च्वनाच्वंगु इलय् हे चौधरीं वंगु संसदीय चुनावय् कैलालीपाखें प्रत्यक्षय् उम्मेदवारी बियाः त्याकूगु खः । वय्कःयात निला न्ह्यव जक सांसद्या सपथ ग्रहण याकूगु खः ।