ने. सं. ११४४ कौलाथ्व तृतीया -

नेकपा वरिष्ठ नेता व डा‍ केसीया प्रतिनिधि दथुइ अनाैपचारिक वार्ता

येँ – चिकित्सा शिक्षा विधेयकयात कयाः अनसनय् च्वनाच्वंम्ह डा. गोविन्द केसीयात कयाः वय्कःया पाखें न्हापा वार्ताय् च्वनीपिं दुजःतय् लिसे सत्तारुढ दलया छम्ह वरिष्ठ नेतां अनौपचारिक सहलह यानाच्वंगु खँ धाःगु दु ।
वंगु शुक्रवाः निसें थ्व अनौपचारिक सहलह जुयाच्वंसां ठोस निष्कर्ष धाःसा पिहां वयेमफयाच्वंगु खँ सीदुगु दु । डा. केसीया अनसन गुकथं त्वाःथलेगु व वय्कःया माग गुकथं संवोधन यायेगु धयागु बारे शुक्रवाः निसें सहलह जुयाच्वंसां अझं छु याये धयागु धाःसा क्वःछि मफयाच्वंगु खँ धाःगु दु ।
डा. केसीया ग्वाहालिमि जुयाच्वनादीम्ह डा अभिषेकराज सिंहं सत्तारुढ नेपाल कम्युनिष्ट पार्टीया छम्ह वरिष्ठ नेतालिसे थःपिनिगु अनौपचारिक सहलह जुयाच्वंगु खँ धयादीगु खः । डा. सिंह थ्वयां न्ह्यव डा. केसी अनसन च्वनीगु इलय् नं वार्ताय् सहभागी जुया वयाच्वनादीम्ह खः ।
वय्कलं थःपिंसं सु नेतालिसे सहलह यानागु धयागु नां मधाःसां शुक्रवाः व शनिवाः नापं च्वनाः खँल्हाबल्हा जूसां सकारात्मक लिच्वः मवःगु खँ धयादीगु दु । वय्कलं थ्व सहलह डा. केसीलिसे सल्हा यानाः हे जुयाच्वंगु खँ नं धयादीगु दु ।
सहलहय् उम्ह नेताय् स्वनिगलय् झिदँ तक मेडिकल कलेज चायेके दइमखु धकाः धयाच्वंगु विषयय् डा. केसी लचिलो जुइत इनाप याःगु खः । डा. केसीया पक्षयापिंसं धाःसा संसदय् दर्ता जूगु चिकित्सा विधेयक लित कायेमाःगु अडान तःगु खः । न्हापा चिकित्सा शिक्षा अध्यादेशया महत्वपूर्ण धयातःगु प्रावधान हे चिइकाः न्हूगु विधेयक संसदय् दर्ता याःगु धासें डा. केसी अनसनय् च्वंवंगु खः ।
मेखे चिकित्सा शिक्षा क्षेत्रया सुधारया माग यानाच्वंगु अनसन च्वनादीम्ह डा. केसीया स्वास्थ्य न्हियान्हिथं कमजोर जुयावनाच्वंगु खँ वय्कःया उपचारय् संलग्न चिकित्सकतय्सं धाःगु दु ।
डा. केसी वंगु झिंन्यान्हु न्ह्यवनिसें अनसन च्वनाच्वंगु दुसां वय्कःया लिसे वार्ताया निंतिं सरकारं ठोस पलाः मल्ह्वःगु खँय् तःधंगु आलोचना जुयाच्वंगु दु । सरकारयात दबाब बिइगु निंतिं टिचिङ अस्पतालय् चिकित्सकतय्सं आकस्मिक सेवा बाहेक फुक्क सेवा बन्द यानाः आन्दोलनय् कुहां वयेधुंकूगु दु । अथेहे नागरिक समाजं नं न्हियान्हिथं प्रदर्शन यानाच्वंगु दु