ने. सं. ११४४ कौलाथ्व पारू - नःलास्वनेगु

छम्ह अन्तरीक्ष यात्रीया गुपचुप नेपाः यात्रा !

येँ – स्वक्वःतक अन्तरीक्षय् याना वयेधुंकूम्ह अन्तरीक्ष यात्री मय्जु सान्द्रा हल माग्नस वंगु निला न्ह्यवंनिसें नेपाः चाःहिउ वयाच्वंगु जुयाच्वन, तर सुनां नं मसिउ । स्वदेश लिहां वनेगु अन्तिम ईपाखे छुं सीमित नेपाःमितलिसे थःगु अनुभव ‘शेयर’ यानाः वय्कः लिहां झाल । म्हिगः स्वदेश लिहां झाःम्ह वय्कलं म्हिगः हे थनया नःघलय् च्वंगु धर्मकीर्ति विहारय् नं छगू प्रवचन बियादिल ।

पेशां खगोलविद् खःसां वय्कः बुद्ध धर्म प्रति नुगः क्वसाःम्ह जुयाच्वन । उकिं बुद्ध धर्मय् प्राप्त जुइगु शान्ति व शून्ययात वय्कलं अन्तरीक्षय् चूलाइगु एकान्तलिसे तुलना यानादिल ।अमेरिकाया अन्तरीक्ष सम्बन्धी संस्था नासाया नायब अधिकृत समेत जुयादीम्ह वय्कः सन् २००२, ०८ व ०९ यानाः स्वक्वः तक अन्तरीक्षय् वनादीगु खः । थ्व स्वक्वलं यानाः वय्कः मुक्कं प्यलात्या अन्तरीक्षय् च्वनादीगु खः ।

थःगु अन्तरीक्ष अनुभव कँसें वय्कलं धयादिल, ‘अन्तरीक्षं स्वयेबलय् पृथ्वी वँचुसे च्वंगु ग्वारा जक थें च्वं । थन छुं नं कथंया सीमा कियातःगु नं खने मदु । बरु क्वथीक स्वयेबलय् नेपाःया हिमालय श्रृंखला खनेदु । उकी सगरमाथा नं खनेदु । व खंसांनिसें जितः नं नेपाः वयेगु इच्छा जुयाच्वंगु खः । थुगुसी व इच्छा पूवन ।’

अन्तरीक्षय् च्वनेबलय् जब जब मानसिक तनाव जुइ अबले आनापाना ध्यान यायेगु खँ नं वय्कलं कनादिल । वय्कलं धयादिल, ‘अन च्वनेबलय् गबलें नं नकारात्मक बिचाः याये मजिउ, छुं नं खँय् काचाक्क प्रतिक्रिया नं बी मजिउ । वास्तवय् बुद्धिजम् धइगु थ्वहे ला खः नि ।’आः लिपा हानं अन्तरीक्षय् वनेगु ग्वसाः याना–च्वनाम्ह वय्कःयात विहार प्रमुख धम्मावती गुरुमांनं भिंतुना बियाबिज्यात ।