लानिपुखू दयेकीपिं ठेकेदार ल्ययेत हानं टेण्डर

येँ – ताः ईया विवाद लिपा लानिपुखू दयेकेगु कथं येँ महानगरपालिकां याःगु तयारी आः हाकनं अन्यौलय् लाःवंगु दु । येँ मनपां माग याः कथंया बोलपत्र व आशयपत्र पेश याःपिं निगुलिं कम्पनीया योग्यता मगाःगुलिं लानिपुखू दयेकेगु ज्या हानं अन्यौलय् लाःवंगु खः । तःभुखाचं क्षति जूगु लानिपुखू दयेकेत निक्वःखुसी कामपां बोलपत्र आह्वान याःगु खः ।

तर बोलपत्र कथं या आशयपत्र मवःगुलिं हाकनं टेन्डर आह्वान यायेमाःगु खः । लानिपुखू दयेकेत इच्छा प्वंकूगु निगुलिं कम्पनीया योग्यता मगाःगुलिं समस्या वःगु खः । येँ मनपाया मेयर विद्यासुन्दर शाक्यया कथं मापदण्ड पूरा मजूगुलिं हाकनं बोलपत्र माग यायेमाःगु अवस्था वःगु दु । वय्कलं धयादी, ‘आः हाकनं बोलपत्र आह्वान यायेमाःगु जूगुलिं भचा ई काइगु जूगु दु ।’

न्हापांखुसी बोलपत्र आह्वान यानाः लानिपुखू दयेकेगु ज्या न्ह्याकूगु खःसा अबलय् निर्माण सामाग्रीया कारणं विवाद ब्वलंगु खः । पुरातत्व विभागं सिमेन्ट व कंक्रिट छ्यलाः निर्माण ज्या न्ह्याकल धकाः विरोध यायेवं दयेकेज्या थाति लाःगु खः ।

थुगु दँय् नं लानिपुखू दयेकेगु ज्या क्वमचाःगुलिं बालगोपालेश्वर देगः थुगुसी स्वन्तिबलय् नं बन्द याइगु जूगु दु । किजापुजा कुन्हु बालगोपालेश्वर देगः चालीगु खःसा अन दाजुकिजा व तःकेहेँ मदुपिंसं किजा पुजा याइगु खः ।