ने. सं. ११४४ कौलाथ्व षष्ठी -

विमति तइपिं वडा अध्यक्षतय्त दुःख बीगु बालेनया नीति

येँ (नेपालभाषा टाइम्स)- येँ महानगरपालिकाया मेयर बालेन साहं थः विरुद्ध मतभेद तइपिं येँया स्थानीय वडा अध्यक्षतय्त आतंकित यानाः जूसां दमन यायेत स्वःगु संकेत खने दया वःगु दु । न्हू सतकय् पेटी तबाला यायेगु ज्याया विरोध यानाच्वंम्ह येँ २२ वडाया अध्यक्ष चिनीकाजी महर्जनयात ख्यायेगु लागिं वय्कलं २२ वडा ज्याकुथिइ नगर प्रहरी छ्वया हयाः अन च्वंगु फुक्कं फाइल लुटे याकूगु दु । वडा अध्यक्ष महर्जनं म्हिगः च्वंगु कार्यपालिकाया बोर्ड बैठकय् थःगु वडा कार्यालयय् थः मदुगु पाः लाकाः डकैटी शैलीं फाइल उठे याना यंकल धासें विरोध प्वंकादीगु खः ।

उकिया लिसलय् प्रमुख प्रशासकीय अधिकृत प्रदिप परियारं घरबहाल कर कयाच्वंगु रसिद अध्ययन यायेत फाइल यंकागु खः धकाः लिसः बियादिल । वडा ज्याकुथिं लुटपाट शैलीं ज्वना वंगु फाइल म्हिगः लित तये हःगु खँ धाःगु दु ।

विशिष्ट सूत्रं धाःकथं आः मेयर साहं थःगु ज्यायात विरोध यानाच्वंपिं मेमेगु वडाया वडा अध्यक्षतय्त नं ‘टार्गेट’ यानाच्वंगु दु । साहं आः येँया वडा नं. २१ व २३ या वडा अध्यक्षपिंत नं उकथं हे दुःख बीगु ज्या यायेफु धाःगु दु ।

थःलिसे मतभेद तइपिं वडा अध्यक्षतय्त थथे हे ख्यानाः दमन याना यंकेगु नीति ज्वंगु जुयाः वडा अध्यक्षत आः सतर्क जुइमाःगु खँ धाःगु दु । मेयर साहं गुलिखे वडा अध्यक्षतय्त थःगु प्रभावय् नं लाकेधुंकूगु व प्रभावित मजुइपिं वडा अध्यक्षतय्त बल प्रयोग यानाः जूसां ख्यायेत स्वयाच्वंगु खँ सूत्रं धाःगु दु ।

मेयर साहया थ्व पलाःयात कयाः इलय् हे सतर्क मजुल धाःसा येँया वडा अध्यक्षतय्त छम्ह छम्ह यानाः सिधयेके फइगु खँ समेत धाःगु दु । उकिं आः एमाले व नेपाली कांग्रेस पार्टी समेत सतर्क जुइमाःगु अवस्था वःगु खँ नं सूत्रं धाःगु दु ।

येँया न्हू सतकय् पेटी तबाला यानाः सतक चिबाला यायेगु मेयरया पलाःयात कयाः नं म्हिगःया बोर्ड बैठकय् मेयर साह व वडा अध्यक्ष महर्जन दथुइ भनाभन जूगु खः । मेयर साहं थौंकन्हय् २४ वडाय् पेटी तबा–ला यानाच्वनागु जुयाः २२ वडाया अध्यक्षयात छाय् कपाः स्याःगु धकाः तकं लिसः बियादीगु खः । मेयर साहं सतक चिबाला यायेगु ज्यायात कयाः सडक विभागं छ्वया हःगु पौयात समेत वेवास्ता यानाः थःपिंत अथे पौ छ्वया हयेगु अधिकार तकं विभागयाके मदु धकाः लिसः बियादीगु खः ।