म्येँचाः मिखाया भाय्या पितब्वज्या

येँ(नेपालभाषा टाइम्स)-म्येँ हालामि तेजवती जोशीया याकः सलय् दुथ्याःगु म्येँचाः ‘मिखाया भाय्’या पितब्वज्या जूगु दु । ताःई न्ह्यःनिसें संगीत ख्यलय् थःगु पलाः न्ह्याका च्वनादीम्ह म्येँ हालामि जोशीया याकः सलय् दुथ्याःगु थ्व न्हापांगु म्येँचाः खः ।

थनया राष्ट्रिय नाचघरय् जूगु छगू ज्याझ्वःया दथुइ म्येँचाः पितब्वज्या याःगु खः । यल महानगरपालिकाया प्रमुख चिरिबाबु महर्जनं उगु म्येँचाःया पितब्वज्या यानादीगु खः । पितब्वज्या जूगु म्येँचालय् दुथ्यानाच्वंगु दक्वं म्येँय् नांजाःम्ह लय्चिनामि जुगल डंगोलं लसय् हनादीगु खः । म्येँचालय् योगेन्द्र राजकर्णिकार, सुरजवीर वज्राचार्य, हरिराम महर्जन ‘थेच्व’, दर्शनवीर शाक्यया म्येँ दुथ्यानाच्वंगु दु ।

ज्याझ्वलय् विशिष्ट पाहांकथं झायादीम्ह जनगायक भृगुराम श्रेष्ठ, लोक गायक रत्न बेहोसी, म्येँ हालामि जोशीया माः बसुमाया जोशीयात हनेज्या याःगु खःसा म्येँ च्वमि, लय्चिनामिलिसें म्येँचाः पिथनेत थीथीकथं ग्वाहालि यानादीपिंत सुभाय् पौ नं लःल्हाःगु खः ।

ज्याझ्वलय् थीथी व्यक्तिपिंसं नुगःखँ तयादीगु खःसा म्येँ हालामि जोशीं म्येँचालय् दुथ्याःगु म्येँ न्यंकादीगु खः ।