डब्लुएनओ झिदँ क्यंगु लसताय् भर्चुअल संवाद

येँ (नेपालभाषा टाइम्स) – वर्ल्ड नेवाः अर्गनाइजेसन (डब्लुएनओ) १० दँ क्यंगु लसताय् छगू भर्चुअल संवाद ज्याझ्वः जुल । कोरोना भाइरस संक्रमणया महामारीया कारणं सार्वजनिक रुपं ज्याझ्वः मयासें भर्चुअल माध्यमं संवाद ज्याझ्वः यानाः थःगु वार्षिकोत्सव हंगु खः ।

डब्लुएनओया नायः सिजन श्रेष्ठं लसकुस यानादीगु ज्याझ्वः ‘ग्लोबल नेवाः : न्ह्यःनेया लँपु’ विषयय् केन्द्रीत जुयाः वंगु डिसम्बर ३० व ३१ तारिख निन्हुयंकं उगु ज्याझ्वः जूगु खः । वाङ्मय शताब्दीपुरुष डा. सत्यमोहन जोशीं भर्चुअल संवाद ज्याझ्वःया माध्यमं पालभाषायात ल्यंकेत व थुकियात अन्तर्राष्ट्रियस्तरय् तकं न्यंको यंकीगु विश्वास प्वंकादीगु खः । वय्कलं अर्गनाइजेसनं अंग्रेजी लगायत मेमेगु भासं नं अनुवादया माध्यमं भूमिका म्हितेत इनाप यानादिल ।

मूवक्ताकथं झायादीम्ह फ्रान्सया प्रोफेसर डा. जेरार्ड टोफिनं ‘गुथिया धार्मिक संसार’ विषयय् न्वचु बियादीगु खः । वय्कलं नेवाः सभ्यताया स्वंगू पक्ष महत्वपूर्ण जूगु धासें नेवाः सभ्यताया तथ्य नेपाः, ज्यापु समुदायया सांस्कृतिक पक्ष व इपिंलिसे स्वापू दुगु हिन्दू व बौद्ध चर्या प्याखं व संगीतया पक्षयात कयाः कुलादीगु खः ।

डब्लुएनओया वरिष्ठ उपाध्यक्ष डा. नारायण राजभण्डारीं छगू दशक न्ह्यः पलिस्था जूगु संगठनं थ्व अवधिइ याःगु थीथी ज्याझ्वः व गतिविधिया बारे जानकारी बियादीगु खः । ज्याझ्वलय् शिक्षा, भाषा, कला-संस्कृति, सम्पदा लगायतया विषयय् झिंस्वंगू देय्या नीस्वम्हेसिनं ज्यापौ न्ह्यब्वयादीगु खः । संवाद ज्याझ्वलय् नेपाःपाखें नेवाः न्ह्यलुवापिं मल्ल के. सुन्दर, डा. महेशमान श्रेष्ठ, नरेश ताम्राकार, नरेशवीर शाक्य, राजभाई जकःमि, आलोकसिद्धि तुलाधर लगायतं ब्वति कयादीगु खः ।

आपालं अनुसन्धानकर्ता, साहित्यिक व्यक्तित्व, कार्यकर्ता, अभियन्ता, संरक्षणकर्मितय्गु नं उपस्थिति दुगु ज्याझ्वलय् नायः श्रेष्ठं अर्गनाइजेसनया संस्थापक दयारत्न शाक्यात डब्लुएनओया संरक्षक घोषणा यानादीगु खः । निन्हुयंकं जूगु संवादया न्हापांगु न्हि ‘शिक्षा’ विषयय् बेलायतया अक्सफोर्ड विश्वविद्यालयया डा. उमा प्रधानया अध्यक्षताय् न्ह्याःगु खः । न्हापांगु सत्रय् नेपाःपाखें सुनिता डंगोलं नेपालभाषा प्रशिक्षण, बेलायतया प्रणिशा शाक्यं बेलायतय् रञ्जना लिपि स्यनेज्याय् खने दुगु समस्या, युक्ता वज्राचार्यं मचा साहित्य सम्बन्धी प्रस्तुति बियादीगु खः ।

निन्हुया न्हिया ज्याझ्वः’भाषा’ विषयय् डब्लुएनओया न्वकु कृष्ण चखुंया अध्यक्षताय् न्ह्याःगु खः । निन्हुया न्हिया सत्रय् नेपाःपाखें रुक्साना कपालीं समलिंगी अधिकार व लैंगिक विशेषता, रसियाया च्वमि कृष्णप्रकाश श्रेष्ठं रुसय् नेपालभाषाया इतिहास, डा. सुभाष प्रजापतिं नेपालभाषायात डिजिटलाइज्ड यायेगु महत्वया बारे व्याख्या यानादीगु खः ।

अक्सफोर्ड विश्वविद्यालयया प्रा. डा. डेभिड एन गेल्नरया अध्यक्षताय् सम्मेलनया निन्हुया न्हिकुन्हु ‘सम्पदा’ विषयय् सत्रय् कानून व्यवसायी लिशा डंगोलं सम्पदास्थल व शिक्षाविद् नापं अभियन्ता सुप्रिया मानन्धरं सौर्यमानकथं नेपाल संवत् सम्बन्धी, डब्लुएनओ नेपाः कवःया पुलांम्ह नायः पुष्कर माथेमां स्वनिगलय् जुयाच्वगु अतिक्रमण व एस्टोनियाया सोभित शाक्यं नेवाःतय् गुथि दुने दुगु नकारात्मक पक्षयात कयाः चर्चा यानादीगु खः ।

थुकथं हे संस्थाया लिउ छ्याञ्जे नापं नेवाः मिसा दबूया नायः रश्मिला प्रजापतिया अध्यक्षताय् ‘सक्रियता’ विषयय् जूगु संवाद ज्याझ्वलय् सेभ नेपाः भ्यालीया कृपेन्द्र अमात्य, नेपाःया लुमु श्रेष्ठं नेवाः आन्दोलन बारे प्रस्तुति बियादीगु खःसा रास जोशीं पृथ्वीनारायण शाह व नेवाःतय्त लाकूगु प्रभाव व राष्ट्रिय नेवाः खलः इजरायलया संरक्षक नरेश नेवालं नं थःगु प्रस्तुति बियादीगु खः ।

ज्याझ्वःया दकलय् लिपांगु सत्र दबूया संरक्षक शाक्यया अध्यक्षताय् ‘संस्कृति’ विषययात कयाः सहलह जूगु खः । थुगु सत्रय् नेपाःपाखें सह प्राध्यापक सावित्री श्रेष्ठं प्वः जाति, विद्यार्थीपिं टिना हो व डा. एलिजा लाउं नेवाः समुदायया परम्परागत प्याखं बारे प्रस्तुति बियादीगु खः ।