जगतसुन्दर ब्वनेकुथिइ लिपि च्वज्या कासा

येँ- जगतसुन्दर ब्वनेकुथिइ म्हिगः श्रीपंचमिया न्हिकुन्हु लाका छगू नेपाल लिपि च्वज्या कासा जुल । ससुद्यःया पुजालिसें नेपाल लिपि च्वज्या कासा नं जूगु खः । ब्वनेकुथिया हे ७, ८ व ९ तगिंया विद्यार्थीतय् दथुइ उगु लिपि च्वज्या कासा जूगु खः । कासाय् अनिता महर्जन न्हाप, आकृति मानन्धर लिउ व साक्षी मानन्धर लियांलिउ जुयादीगु खः ।

अथे हे सुजित श्रेष्ठ, प्रिया शाही व रुजिना तामाङं हःपाः लाःगु लिपि च्वज्या कासाय् विजयी जुयादीपिंत मूपाहां नेपाल लिपि गुथिया निर्मल वज्राचार्यं दसिपौ व सिरपाः लःल्हानादीगु खः । ब्वनेकुथिया पुलांम्ह प्रिन्सिपल माया मानन्धरया सभापतित्वय् जूगु ज्याझ्वलय् चिनाखँ पाठ यायेगु ज्या नं जूगु खः । ब्वनेकुथिया हे ब्वँपिंसं पाठ याःगु चिनाखँया समीक्षा लोककवि राजभाई जकःमिं यानादीगु खः । लिपि च्वज्या कासा ब्वनेकुथिया हे शिक्षक मणिराज मानन्धरया संयोजकत्वय् जूगु खः ।