ताम्रकार समाजया मंकाः इहि मुना

यल(नेपालभाषा टाइम्स)- ताम्रकार समाजया ग्वसालय् जूगु मंकाः इहि मुना ज्याझ्वः क्वचाःगु दु । समाजया ग्वसालय् झिंन्याक्वःखुसी मंकाः इहि मुना ज्याझ्वः जूगु खः । समाजया सामाजिक विधि व्यवहार व्यवस्था उपसमितिया संयोजनय् उगु ज्याझ्वः जूगु खः ।

समाजया थःगु हे भवन जावलाख्यलय् च्वंगु तमकः द्यः (उग्रचण्डी माई)याथाय् जूगु इहि मुनाय् २१ म्ह मिसा मस्तय् सहभागिता दुगु खः ।

समाजं दँय्दसं थुकथं मंकाः इहि मुना ज्याझ्वः याना वयाच्वनागु व कोरोना संक्रमणया कारणं वंगु निदँ थुखे ज्याझ्वः याये मखनाच्वंगु उपसमितिया संयोजक नापं समाजया सह कोषाध्यक्ष मनोज ताम्रकारं कनादिल । लिसें थुकथंया इहि मुना ज्याझ्वलं नेवाः संस्कार व विधि व्यवहारय् अनावश्यक रुपं खर्च यायेगु प्रवृत्तियात नं पने फइगु वय्कलं कनादिल ।

समाजया अध्यक्ष विनोद ताम्रकारं नेवाः समाजय् अनिवार्य कथं कयातःगु थुकथंया संस्कार मंकाःकथं यायेबलय् ई व ध्यबा नितां बचत जुइगु खँ कनादिल ।