किपुलिइ सायाः पिथनेगु तयारी

किपू – थुगुसी गुंपुन्हिया झ्वलय् थन सायाः पिकाइगु जूगु दु । कोरोना संक्रमणया महामारीया कारणं आपालं नखःचखः, संस्कृति, परम्परा, गुथि हनेगुलिइ तकं प्रभाव लानाच्वंगु इलय् किपुलिइ थुगुसी सायाः न्यायेकेगु तयारी शुरु जूगु दु ।

थनिं दछि न्ह्यः सायाः पिकायेगु तयारी याना च्वँच्वं कोरोना संक्रमण तच्वया वनेवं न्यायेके मखनेवं थुगुसी सायाः पिकायेगु तयारी आवंनिसें शुरु याःगु खः । थन दँय्दसं छगू छगू त्वालं पाः कयाः सायाः न्यायेकेगु याना वायच्वंगु दु । थ्व ल्याखं थगुने किपू वडा न. ३ क्वछेँ, चाफः त्वाःया पाः लाःगु खः । पाः लाःगु त्वालं सायाः पिकायेगु तयारी याना च्वँच्वं कोरोनाया कारणं पिथने मफयेवं थुगुसी सायाः पिथनेगु तयारी याःगु खः ।

पाः लाःगु त्वाः क्वछेँ, चाफः त्वाःया प्रतिनिधि, आकिवं पाः काइगु त्वाः वडा नं. ९ बाडेगांया प्रतिनिधि, किपू जात्रा पर्व समितिया पदाधिकारी, किपू नगरपालिका वडा नं. १ या वडाअध्यक्ष हर्ष महर्जन, २ वडाअध्यक्ष रमेशमान महर्जन, ३ वडाअध्यक्ष राजेन्द्र महर्जन, ९ वडाअध्यक्ष गंगाराम महर्जनलिसें मेपिं जनप्रतिनिधि व सरोकारवाला व्यक्तितय् आः नकतिनि च्वंगु छगू मुँज्यां सायाः पिथनेगु निर्णय यासें उकिया निंतिं तयारी तकं न्ह्याकूगु खः ।

सहलह मुँज्यां थुगुसी किपुलिइ सायाः पिथनेगु निर्णय यासें छु गथे जुयाः सायाः पिथनेगु सम्भव मजुल वा सम्भावना नं म्हो जुल धाःसा सांकेतिक रुपं ख्वाःपाः जक पिथनाःजूसां पाःब्व लःल्हायेगु नं क्वःछिउगु दु ।

सम्बन्धित बुखँ

LEAVE YOUR COMMENTS