आख्यानकार साय्मिया ताःहाः बाखं सफू पिदन

येँ(नेपालभाषा टाइम्स)÷नेपालभाषा साहित्य ख्यःया नांजाःम्ह आख्यानकार मथुरा साय्मिया न्हूगुु बाखं सफू ‘चिप निप’ पिदंगु दु । आख्यानकार साय्मिया ताःहाः बाखं सफू वंगु शनिवाः जूम अनलाइनपाखें पितब्वज्या जूगु खः ।

नांजाःम्ह बाखं च्वमि राजा शाक्यं सफूया पितब्वज्या यानादीगु खः । पितब्वज्या जूगु सफूयात कयाः च्वमि मथुरा साय्मिलिसें विशिष्ट पाहांकथं ब्वति कयादीम्ह नेवाः न्ह्यलुवा लिसें साहित्यकार मल्ल के. सुन्दर, डा. बालगोपाल श्रेष्ठ, डा. रीना तुलाधर, प्रमिला साय्मि लगायतया साहित्यकारलिसें च्वमिपिंसं नुगःखँ तयादीगु खः ।

साहित्याकार पूर्ण ताम्राकारं सफूयात कयाः समीक्षा यानादीगु खःसा राकेश महर्जनं नं नुगःखँ तयादीगु खः ।

अमेरिकाया शिकागोय् च्वँच्वनादीम्ह साहित्यकार केशरमान ताम्राकारं थः मांअबुया नामं नीस्वनादीगु भिक्षु हिरा फाउण्डेसनपाखें उगु सफू पिथंगु खःसा ज्याझ्वः नं वय्कलं हे न्ह्याकादीगु खः ।

फाउण्डेसनपाखें न्हापांखुसी सफू प्रकाशनय् हःगु खःसा थ्व स्वयां न्ह्यः पूर्णकाजी ताम्राकार, पुष्परत्न तुलाधर, सुगतदास तुलाधर, हितकर बीर सिंह कंसाकार व सुवर्णमान तुलाधरयात फाउण्डेसनपाखें भिक्षु हिरा सिरपाः लःल्हाःगु खः ।

सम्बन्धित बुखँ

LEAVE YOUR COMMENTS