
येँ – नेवाःतय् राष्ट्रिय संस्था नेवाः देय् दबू आः संघीय संरचनाय् वनीगु जूगु दु । नेपालगञ्जय् नकतिनि क्वचाःगु विधान अधिवेशनं विधान संशोधन यानाः थ्व व्यवस्था याःगु खः ।
देय् दबू संघीय संरचनाय् वनेगु जुइवं आः थुकी न्हय्ग्र प्रदेशया न्हय्गू प्रदेश कमिटी लिसें स्वनिगःया लागिं छगू बिस्कं ‘स्वनिगः प्रदेश’ कमिटी दयेकाः च्यागू कमिटी थपे जुइगु जूगु दु । अथे हे आः विदेशय् च्वंगु नेवाः खलः पुचःतय्सं नं नेवाः देय्या सम्बन्धन काये फइगु जूगु दु ।
देय् दबूयात दलीय राजनीतिपाखें मुक्त यायेगु लागिं देय् दबूया केन्द्रंनिसें कयाः वडा कमिटीइ तकं पदय् च्वंपिं सुं हे पदाधिकारी थः पदय् च्वनाच्वंत्तले गुगुं नं राजनीतिक दलया दुजः जुयाः सार्वजनिक रुपं प्रकट जुइ दइ मखु धइगु प्रस्ताव वःगु खः । तर अधिकांश दुजःतय्सं उकी विरोध याःगु कारणं आःया लागिं केन्द्रीय अध्यक्ष छम्ह थः पदय् दत्तले गुगुं नं राजनीतिक दलया पदय् च्वनाः सार्वजनिक जुइ मदइगु व्यवस्था जूगु दु । थ्व नं विधानय् हे उल्लेख याइगु जूगु दु । आःयात केन्द्रीय अध्यक्षया लागिं लागू जुइगु थ्व व्यवस्था लिपा मेमेगु पदय् च्वंपिनि लागिं नं लागू याना यंकेगु नं सहमति जूगु खँ सीदुगु दु ।
उकथं हे नेवाः देय् दबूया छुं नं कमिटीया पदाधिकारी जुइपिंसं अनिवार्य रुपं नेवाः भाय् ल्हाये सयेमाः धइगु प्रस्ताव नं अधिवेशनय् वःगु खः । तर तत्काल थ्व व्यवस्था यायेत थाकुइगु जुयाः नेवाः भाय् ल्हाये सःपिंत प्राथमिकताय् तयेगु लिसें भाषायात महत्व बियाः न्ह्याका यंकेगु खँय् नं सहमति जूगु खँ सीदुगु दु । नेवाः देय् दबू गठन जूगु निगू दशक पुलेधुंकाः तक नं भाय् सयेका कायेगु खँय् दबूया पदाधिकारीत उदासिन जुइगुया लिसें दबूया ज्याझ्वः तकं खय् भासं सञ्चालन याये मालाच्वंगु खँय् आलोचना जुइगु याः ।
चैत्रं विराटनगरय् राष्ट्रिय तःमुँज्या
नेवाः देय् दबूया तःमुँज्या (महाधिवेशन) थ्वहे दँया चैत्र महिनाय् विराटनगरय् याइगु जूगु दु । विधान अधिवेशनय् वःगु थ्व प्रस्तावयात अन हे अनुमोदन याःगु खः । तःमुँज्या याये न्ह्यः थीथी प्रदेश, जिल्लांनिसें पालिका व वडाया तकं अधिवेशनत क्वचायेकेगु ज्याझ्वःत नं पारित याःगु दु । ज्याझ्वः कथं आः वइगु फागुन मसान्त तक प्रदेशतय्गु अधिवेशन, फागुण १५ तक जिल्ल अधिवेशन व माघ १५ तकया दुने पालिका व वडाया अधिवेशन क्वचायेकीगु जूगु दु ।
LEAVE YOUR COMMENTS