अफ्रिकन कासामिं जाःगु फ्रेञ्च टिम

सन् १९८२ लिपा न्हापांखुसी थुगुसीया विश्वकपय् छगू नं अफ्रिकन टिमं समूह चरण पार याये मफुत । विश्वकप म्हितेगु निंतिं रसिया थ्यंकःवःगु अफ्रिकन टिम इजिप्ट, नाइजेरिया, ट्युनिसिया, सेनेगल व मोरक्को न्हापांगु चरण लिपा लिहां वनेमाल । थ्व ल्याखं अन्तिम झिंखुगूगुया कासा सुरु जूबलय् हे छगू नं अफ्रिकन टिम मदयेधुंकल ।

अथे खःसां छथ्वसिनं धाःसा फाइनल तकं अफ्रिकन टिम दु धकाः धयाच्वंगु दु । उमिसं थथे अफ्रिकन टिम धकाः दावी यानाच्वंगु धाःसा फ्रान्सया टिमयात खः । फ्रान्सया टिमय् अप्वः धयाथें हे अफ्रिकन मूलया कासामित दुथ्यानाच्वंगु दु । उकिं हे उमिसं थुगुसीया विश्वकपय् अफ्रिकन टिम ल्यनाच्वंगु दनि धयाच्वंगु खः ।

खः नं खः फ्रान्सया २३ म्ह दुजः दुगु टिमय् झिंनिम्ह ला अफ्रिकन मूलया हे कासामित दुथ्यानाच्वंगु दु । थुगुसी थःगु ब्वाँय् वनेगु क्षमताया निंतिं तसकं चर्चाय् वयाच्वंम्ह केलियन एम्बाप्पे क्यामरुन मूलयाम्ह खः । वया अबु क्यामरुनयाम्ह खःसा मां अल्जेरियाली खः । अथेहे फ्रान्सयात फाइनल तक थ्यंकेत बेल्जियम विरुद्ध निर्णायक गोल याःम्ह स्यामुल उमटिटी नं अफ्रिकन मुलयाम्ह हे खः ।

फ्रान्सेली टिमय् स्ट्राइकर जुयाच्वंपिं उसमान डेम्बेले, एन्जेलो कान्टे, पाउलो पोग्बा, नबिल फेकिर नं अफ्रिकन मुलयापिं हे खः । फ्रान्स जक मखु मेमेगु देय्या नं यक्व हे कासामित विदेशी मुलयापिं जुयाच्वंगु दु ।

फ्रान्स विरुद्ध सेमिफाइनल म्हितूगु बेल्जियमया स्वर्णिम पुस्ताया कासामिपिं मध्ये मरुन फेलानी,नासर चाडली, रोमेलु लुकाकु, भिसेन्ट कम्पनी, डेडनिक बोयाटा, मिची बातशुयाइ, मूसा डम्बेले, एक्सल विट्स व अनदान जनुजाज नं विदेशी मूलया हे कासामि खः । थुगुसी सेमिफाइनलय् थ्यंगू प्यंगुलिं टिम युरोपया खः, तर थ्व प्यंगुलिं टिमय् अफ्रिकी मूलया कासामितय् वर्चश्व दु ।