मेसी व बार्सिलोना दथुया सम्झौता क्वचाल

एजेन्सी- अर्जेन्टिनाया स्टार कासामि लियोन मेसी व स्पेनिस क्लब बार्सिलोना दथुइया सम्झौता क्वचाःगु दु । बार्सिलोनां मेसीलिसे न्हूगु सम्झौता यायेत स्वःगु खःसां सफल धाःसा जुइ फयाच्वंगु मदुनि । मेसीं वंगु दँय् हे बार्सिलोना त्वःतेत स्वःगु खःसा सम्झौताया कारणं मत्वःतूगु खः । मेसी आः न्हापाखुसी फ्रि–ट्रान्स्फरय् थ्यंगु दु । थ्व ल्याखं मेसी आः थःगु इच्छा कथं मेगु छुं नं क्लबय् वने खनी । युरोपया ततःधंगु क्लबं मेसीयात थःपिंथाय् हयेत स्वयाच्वंगु दु । बार्सिलोनां नं मेसीयात थःपिनिगु क्लबय् हे तयेत स्वयाच्वंगु दु ।

मेसी १३ दँ दुबलय्निसें हे बार्सिलोनां म्हिता वयाच्वंगु खःसा सन् २००० निसें बार्सिलोनाया सिनियर टिमं म्हितावयाच्वंगु खः । मेसीं वंगु सिजनय् न्हापांखुसी क्लब त्वःतेगु खँ धाःगु खःसा बार्सिलोनां तःगु ७ अर्बया रिलिज क्लज पूवंकेफुपिं मेगु छुं कब्ल मदुगुलिं मेसी उगु सिजनय् बार्सिलोनाय् तुं च्वंगु खः ।

मेसी आः छु क्लबय् वनी धयागु सीमदुनि । मेसीं बार्सिलोनाय् हे च्वनी ला कि मेगु क्लबय् वनी धइगु खँय् धाःसा चर्चा तच्वयाच्वंगु दु । थौंकन्हय् कोपा अमेरिकाय् व्यस्त जुयाच्वंम्ह मेसीं बार्सिलोनाया निंतिं १७ दँ म्हितेधुंकूगु दु ।