थाइल्यान्डया गुफा फसे जूपिं सकलें मस्त व प्रशिक्षक उद्धार

एजेन्सी- उत्तर थाइल्यान्डया ट्याम लुंग नांया छगू गुफाय् फसे जुयाच्वंपिं सकलें मस्त व वया प्रशिक्षकयात सकुशल उद्धार याःगु दु ।
थाइल्यान्डया नेवी सिलं झिंनिम्ह मस्त व वया प्रशिक्षकयात सुरक्षित उद्धार यानागु खँ धाःगु दु । मस्तय्त गुफां पित हयेधुंकूसां उमित उद्धार याःवंपिं छम्ह चिकित्सक व प्यम्ह डाइभरत धाःसा गुफां पिहां मवःनिगु खँ धाःगु दु ।

उद्धारया झ्वलय् थौं प्यम्ह मस्त व प्रशिक्षकयात गुफां पित हःगु खः । मेपिं च्याम्ह मध्ये प्यम्हेसित शनिवाः व प्यम्हेसित सोमवाः गुफां उद्धार यानाहःगु खः ।

मस्तय् सकुशल उद्धार लिपा थाइल्यान्डया प्रधानमन्त्री प्रयुत चान ओचां मस्तय्त पित हःगु इलय् सैनिकतय्सं नइथेंज्याःगु वासः नका हःगु खँ धाःगु दु । वय्कलं मस्तय्त बेहोश याना हःगु धकाः पिहां वयाच्वंगु खँया खण्डन यासें मस्तय् मग्यायेमा धयागु ल्याखं सैनिकतय्सं नइथें ज्याःगु चिन्ता निवारक वासः नका हःगु खँ धाःगु दु ।

गुफां उद्धार यानाहःपिं सकलें मस्त शारीरिक व मानसिक रुपं स्वस्थ दुगु खँ धाःगु दु । तर उमित आः अस्पतालय् नयाः निगरानी यानाच्वंगु दु । उमित वया मांअबुपिंत धाःसा नापलाके बिउगु मदुनि । मस्तय्त धाःसा अस्पताल दुनं मांअबुपिनि ख्वाः धाःसा क्यनेधुंकूगु दु ।
मस्तय्त छुं कथंया संक्रमण मदु धयागु पक्का जुलकि उमित मांअबु नापलाकीगु खँ धाःगु दु ।

मस्तय्त गुफा पित हःबलय् सनग्लास तयेकाः, म्ह छम्हं कापतं भुंका हःगु खः । निवाः तक खिउँगु गुफाय् च्वनाच्वंपिं जूगुलिं छक्वः निभाः जलं मथिइमा धकाः सनग्लास तयेका हःगु खः ।

मस्तय् उद्धारया निंतिं पीम्ह थाइ डाइभर व न्यय्म्ह विदेशी डाइभरतय्सं ज्या याःगु खः । उद्धार यायेगु निंतिं उमिसं लः दुने खिपः लाया यंकाः खिपः ज्वनाः ज्वनाः पिहां वःगु खः ।

मस्त च्वनाच्वंथाय् तक थ्यंकेत तसकं थाकुक वनेमाःगु खँ धाःगु दु । अन तक थ्यंकेत गनं तगाःगु लः दुथासं, गनं पाखाः गयाः, गनं मनू छम्ह हे न्ह्यंके थाकुगु गल्ली जुयाः वनेमाःगु खँ धाःगु दु । मस्तय् दुथाय् तक वये वने यायेत डाइभरतय्त झिंछघौ ई माःगु खँ धाःगु दु । थ्व गुफा झिगू किलोमिटर स्वयां ताःहाकः दुगु खःसा मस्त प्यंगू निसें न्यागू किलोमिटर तक दुने थ्यनाच्वंगु खः । मस्तय्त उद्धार याःवंम्ह छम्ह थाइ डाइभर सीगु खः ।

मस्त व प्रशिक्षक गुफा दुहां वनाच्वंगु इलय् आकाझाकां चलः वयाः गुफा मूद्वाः प्वातिइवं मस्तय् गुफाय् फसे जूगु खः । तसकं वा वया गुफा दुने लः जाया वःलिसे मस्त च्वय् च्वय् पाखे थहां वंगु खः ।