स्वनिगःया आपालं विद्यालय भवन पुनःनिर्माण मजू

येँ – राष्ट्रिय पुनःनिर्माण प्राधिकरण केन्द्रीय आयोजना कार्यान्वयन इकाइ (शिक्षां) स्वनिगःया विद्यालय पुनःनिर्माणं खास हे गति काये मफुगु खँ धाःगु दु । इकाइया येँ शाखायाकथं येँया थीथी विद्यालयया ९३९ क्वथा भुखाचं क्षति जूगु खः । उकीमध्ये निदँया दुने प्यकू, खुकू व च्याकू क्वथा यानाः २६९ कू क्वथा जक निर्माण जूगु इकाइं न्ह्यथंगु दु ।

येँया हे दकलय् पुलांगु व ऐतिहासिक विद्यालयमध्ये छगू विश्व निकेतन उमाविया २४ कू कक्षा क्वथा दुगु भवन धाःसा अन्तिम चरणय् थ्यनाच्वंगु दु । उगु भवन जुद्ध शम्शेरं धर्मशालायात बिउगु खःसा २०७२ सालया तःभुखाचं बांमलाक क्षति जूगु खः । थौंकन्हय् उगु विद्यालयय् निजी विद्यालय त्वःताः वःपिं नापं यानाः करिब २६०० विद्यार्थी अध्ययन यानाच्वंगु दु ।

अथे हे थनया रानीपुखू न्ह्यःने च्वंगु भानु माविया भवन पुनःनिर्माणया निंतिं नक्सा स्वीकृत जुइधुंकूगु दु । विद्यालयया नक्सा स्वीकृत जुइवं थौंकन्हय् प्रदर्शनीइ च्वंगु बाल्मिकी विद्यापीठया चौरय् ट्रष्ट निर्माण यानाः कक्षा क्वथा तयार यायेगु ज्या जुयाच्वंगु व आः अनं हे कक्षा संचालन यायेगु तयारी जुयाच्वंगु दु । ट्रष्ट निर्माणया ज्या पूवेनवं पुलांगु विद्यालय भवन थुनेगु तयारी जुयाच्वंगु दु ।

उखे यल इकाइ शाखायाकथं यलया ६९ गू विद्यालयया भवन निर्माण जूगु दुसा ४३ गू विद्यालय भवन निर्माणााधिन अवस्थाय् दु । थुकथं हे ख्वपय् नं १२९ सामुदायिक विद्यालयमध्ये ९७ स्कुल भवन भुखाचं क्षति जूगु खः । उकी मध्ये विश्व सम्पदाया धलखय् दुथ्यानाच्वंगु श्रीपद्मम उमावि, शारदा उमावि व विद्यार्थी निकेतन उमावि विद्यालय भवनया पुनःनिर्माणया ज्या आतकं न्ह्याके फयाच्वंगु मदु ।