तोखाय् बिस्काःया निंतिं व्यवस्थापन समिति

येँ – तोखाय् बिस्काः जात्रा हनेत छगू समिति नीस्वंगु दु । नेवाः गुथिया तोखाया नायः देवराज डंगोलया संयोजकत्वय् तोखा बिस्काः जात्रा मूल व्यवस्थापन समिति गठन याःगु खः ।डंगोलया संयोजकत्वय् नीस्वंगु व्यवस्थापन समितिइ सत्यनारायण डंगोल सहसंयोजक, रमेश नापित मूछ्यांजे, दीपेन्द्र श्रेष्ठ छ्यांजे, रामलाल महर्जन कोषाध्यक्षय् च्वनादीगु दु । अथे हे संयोजक डंगोलया हे संयोजकत्वय् सचिवालय नं गठन याःगु दु ।तोखा नगरपालिकाया प्रमुख प्रकाश अधिकारी, उपप्रमुख ज्ञानमाया डंगोल, वडा नं. २ या वडाअध्यक्ष दीपकराज जोशी ३ वडा अध्यक्ष सिंहराज जोशीयात व्यवस्थापन समितिया संरक्षक व सल्लाहकारकथं ल्यःगु दु ।

थुकथं हे सल्लाहकार समितिया मू नायःकथं हेमराज श्रेष्ठ च्वनादीगु दुसा दुजलय् अष्टनारायण डंगोल, गणेशमान श्रेष्ठ, मनिष जोशी, हरिदास श्रेष्ठ, माइला डंगोल, मोतिलाल श्रेष्ठयात सल्लहाकार ल्यःगु दु । जात्रा तःजिक व सभ्य रुपं हनेत थीथी उपसमिति नं नीस्वंगु दु । उपसमितिइ सुशान्त डंगोल (प्रचार प्रसार), सूर्यमान डंगोल (सांस्कृतिक), राजकाजी श्रेष्ठ (सुरक्षा व्यवस्था), राष्ट्रमान श्रेष्ठ (यातायात व स्वयमसेवक परिचालन), संगीता डंगोल (सरसफाई), सोमकुमारी जोशी (त्वनेगु लः व्यवस्थापन), निर्मला श्रेष्ठ (स्वास्थ्य), अष्टकुमार श्रेष्ठ (खः व्यवस्थापन), हेमराज श्रेष्ठ (जात्रा तयारी व पुजा व्यवस्थापन), प्रेमकृष्ण खड्गी (अनुगमन व भौतिक निर्माण, विजय डंगोल (स्टल), आभूषणप्रका डंगोल (सजावत) व धनवीर डंगोल (सवारी व पार्किङ) संयोजक जुयादीगु दु ।