सम्पदा विधेयक दयेकेबलय् आदिवासीतय् प्रतिनिधित्व याकेत सुझाव
येँ (नेपालभाषा टाइम्स) – अभौतिक सांस्कृतिक सम्पदा संरक्षण सम्बन्धी विधेयक आदिवासीतय् प्रतिनिधित्व जुइकथं व समुदायया अपेक्षा कथं दयेकेत विज्ञतय्सं सुझाव बिउगु दु । प्रतिनिधि सभा अन्तर्गतया अन्तर्राष्ट्रिय सम्बन्ध व पर्यटन समितिया म्हिगः जूगु बैठकय् विज्ञतय्सं थ्व सुझाव बिउगु खः । थ्व झ्वलय् विज्ञतय्सं अभौतिक सम्पदा संरक्षण सम्बन्धी अन्तर्राष्ट्रिय कानुन व नेपालं नाला वयाच्वंगु सन्धि सम्झौतायात ध्यानय् तयाः विधेयकयात अझ परिस्कृत यायेमाःगु खँ धाःगु खः ।
बैठकय् न्ववासें आदिवासी जनजाति आयोगया दुजः मीनबहादुर श्रीसं संविधान व प्रचलित कानुनं आयोगयात आदिवासी जनजाति सम्बन्धी अन्तर्राष्ट्रिय सन्धि, सांस्कृतिक सम्पदा संरक्षण व नीतिगत सिफारिस यायेगु जिम्मेवारी बियातःगुलिं विधेयक दयेकेबलय् आयोग व आदिवासी समुदायया प्रतिनिधित्व जुइगु संस्थातय्त बेवास्ता यायेमजिउगु खँ धयादीगु खः ।
नेपाःया संविधान व आदिवासी ऐनय् भौतिक व अभौतिक सांस्कृतिक सम्पदाया व्यवस्थापनया निंतिं नेपाः सरकारयात नीतिगत सिफारिस यायेगु जिम्मा आयोगयात बियातःगु दु । नेपाःया अभौतिक सम्पदा संरक्षणय् आदिवासीतय् मू भूमिका दुगु खँ न्ह्यथनादिसें आयोगया दुजः श्रीसं नेपाःया फुक्क धयाथें अभौतिक सांस्कृतिक सम्पदा आदिवासी जनजाति व स्थानीय समुदायया परम्परापाखें पुस्तान्तरण जुयाः संरक्षित जुया वयाच्वंगुलिं आदिवासी जनजाति समुदायया प्रतिनिधित्व याइगु संस्थातय्त ऐनं बेवास्ता यायेमजिउगु सुझाव बियादीगु खः ।
सहलहया झ्वलय् अधिवक्ता भीम नेपालं संस्कृति संरक्षणया सन्दर्भय् समुदायया कानुनी अपेक्षा छु खः धयागु थुइकाः उकथंया कानुन दयेकेफत धाःसा अभौतिक संस्कृति संरक्षणय् ग्वाहालि जुइगु जूगुलिं विधेयक दयेकेबलय् थ्व खँय् विशेष ध्यान बीमाःगु खँ नं वय्कलं धयादीगु खः ।
वय्कलं संविधानं प्रत्याभूत यानातःगु सांस्कृतिक सम्पदा सम्बन्धी कानुनत अझ नं अभाव दुगु खँ न्ह्यथँनादिसें धर्म, संस्कृति व परम्परा हने दइगु नागरिक अधिकारयात कानुनी रुपं सुनिश्चित यायेमाःगु खँ धयादीगु खः । अथेहे संस्कृतिविद् डा. सोम धितालं अभौतिक सम्पदाया महत्व व कानुनी व्यवस्था बारे अझ नं समुदायय दुने गाक्क चेतना मदुनिगुलिं देय्न्यंकं जनचेतना थनेत अभियान हे न्ह्याकेमाःगु खँ धयादिल ।
LEAVE YOUR COMMENTS